ملاحظة: عوضو ال ( ك') بال ( ق) باش تفهمو الموضوع

آنا ڨاوريّة... مشكلتي كبرت و ماعادش صبية... عرست مرة في صغري و طلك'ت و للحب من وك'تها ما لك'يتش ثنية... في هالعمر حبيت واحد موش من بلادي لكن غدرني و عداها عليا... سافرت و شك'يت على خاطرو برور و بحور...

تحملت كلام أهلي و طبايع الناس إلي عليا ك'اعدة تدور... ك'راو حساب الدين و الملة... و حساب فرك' العمر و كا'لولي ألا ما يدخلك في الحلة... آنا طفيتهم و بنيتي مشيت و قلبي تبعت...هو صغير و شباب... يحكي بلغة أخرى ما نعرفش نك'رى بيها حتى كتاب... على ك'دو زوالي ... سلبني من عك'لي و ك'لبي خذالي...

فما لغة تجمعنا نتكلمو بيها أحنا الزوز ... كلام ساهل نكو'لو فيه لكن في ك'لبي عمل عروك'... حبيتو و عزيتو و روح الروح و عزيز الك'لب سميتو ... سكنتو في عينيا... و ما خطيت ما عملت معاه و كنتلو الصدر الحنين... شخصيتو و وجودو فرضتهملو في بلادي...أوراكو' و تعرضت على حكومتي...عك'دنا و تكتب ... فرح بارشا و عبرلي بكلامو إلي هو غاطس فالحب... شرى بفلوسي إلي اشتهى و إلي حب...ك'رى و زاد ك'رى خدم و زاد في كارييرو تعلم... عطيتو حبوب عينيا و سكنتو في جواجيا... صعيب يكون بو صغاري السن ما يسمحش لكن تمنيتو يكون ...
هادي عرفتو حنين كلامو عسل يك'طر عينيه بالحب تتذبل...

وعدني بالعشرة الطويلة و حلفلي على محبتو الكبيرة ... حسسني بأنوثتي و خرج البنية الشبابة إلي فيا... بيه هو تملات حياتي ... زهات تلونت ...إحساس دافي و مشاعر بنينة بمعرفتي ليه تكونت...

الحب إلي حبيتهولو ما عرفتوش ك'بلو... هو بك'ية حياتي و فرحتي إلي ما حسيتها كان معاه... في المرايا معادش نشوف روحي فت الخمسين... روحي صغرت و رجعت ﻷيامات العشرين... التجاعيد تنحات و ملات وجهي التبسيمة. .. السعد و الهنا ضحكولي أول مرة ك'دامي ... ناسي كي شافو فرحتي نك'صو في ملامي... حلي كيما تك'ولو في الجنة ذراع... و في أول فرصة سمحتلو باع... أول ما نفنف ريشو نكر... غدر و طيش خيري كلو على طول إيدو في البحر... لا حس عليا و لا كا'ل بالعشرة نشوف... لا خاف على ك'درو و لا كا'ل ظهرت طبيعتي المشومة للناس بالمكشوف...

ذيب نحى لباس الحمل و كشرلي على نيابو... حبالو إلي ذبت فيهم كتفني بيهم و شمت فيا أحبابي و أحبابو... بعدما ما سلب إلي سلب و نهب المتبكي' من عمري و هرب...
خلاني حالة فمي باهتة و كالريشة في مهب الريح... لا عارفة نك'وي روحي و لا عارفة نسلم في كل شي و نطيح...

فارك' العمر إلي كا'ل ما يهموش اليوم ولى أهم من ك'ضية فلسطين عندو...

و الدين إلي بدلتو على خاطرو اليوم ولى يعاير فيا بيه...

الفلوس إلي تصرفو و مشاو آخر حاجة يتفكرها كينو كان واجب عليا نصرف عليه...

كانت حاجة فيا تحب تصحيني و ترجعلي ساك'يا على الأرض و آنا غمضت عليها عينيا...

عاديت إلي يحبوني و يخافو عليا و صدك'ت كلامو المعسل و حلفانو ليا... تجاعيد وجهي خباتها فلوسي ... و أركا'م عمري غطاها بالدوسي... ك'بض في يدو صلوحية الإكا'مة و طيشني... سد عليا النفس و نحى مني الأمل و الحب إلي كان معيشني...

علاش ياخي موش إلي يحب ما يكذبش؟؟...

و العمر في الحب ما يتعيبش؟؟ ...

و إلا كلامو هزو الريح ؟؟...

و ماشي في بالو بإلي يعمل ما فماش حساب و من ذنبو باش يرتاح و الجرح فيسع يشيح ؟؟...

هاذا الكل خاطرني ڨاوريّة؟ ؟...

نسى إلي آنا إنسانة و مشيت معاها بالنية...

آنا موش مسامحة و رب السماء عليا شاهد من الفوك ' ...

و كيف ما عمل فيا نتمنى يعرف وجيعة الك'لب بعد الخدعة و يحس بالغدرة و حرارة الفرك'ة يذوك' ...