يوما ما
Dorra Rezgui - درة رزڨي
انا طفلة صغيرة تولدت في حومة عربي و كان في صغري بارشا وجيعة نعرف الي ممكن لحكاية مايفهموهاش برشا ناس خاطر مايحس بالجمرة كان الي يعفس علاها
كل مانجي نحلم حلمة نبكي خاطرني انثى حكايتي ملي انا صغيرة كل مانحلم حلمة يجي في وذني كلام امي احشم راك صبية... نحلم نحب نطير يزي راك طفلة ... نحب نجنح .. يزي راك انثى كل منحط طرف كحل ناكل طريحة نباش لقبور حتي يجيني مكتوبي كرهت روحي و كرهت حاجا اسمها انثى رغم الي انا انثى و كبرت لوجيعة معايا كنت نكره خويا على قد منحبو هو .. ذكر يفيق وقت ميحب و يسهر لوقت ميحب و انا محكوم عليا بش كي يكمل سهريتو
انا نحلو الباب . علمتني امي الي القضية و غسلان الماعون و الصابون اهم من قرايتي و الي باش نهار اخر نهز راس امي كي نبدى حاذقة و علمتني الي الكوجينة اهم من كتاب نقراه كبرت و خذيت الباك و حبيت نمشي لجامعة قلت غادي وين نحل جناحاتي و نكمل نوصل للي نحلم بيه يخي بابا قلي وين ماشية
متسمعش بلي البنات اش يصير فاهم و الي ماشية
تاخو الديبلوم تاخذ الديبلوم في كرشها وتروح بيه لعائلتها قالي الي لازم نبقى نستنى مكتوبي اذاكا هو ديبلومي نهارتها بكيت الي يبكيه ليتيم على امو
و عديت ليالي نحلم بنهار الي باش ندخل فيه للفاك
.
اكهو جا النهار الي دق فيه باب دارنا و تلفقت و خذيت و عرست و عمري لا حسيت روحي عبد كيني بدن بلا روح للي جاني فيه النهار الي حبلت و تمنيت نجيب طفلة و الحمدالله جبت بنية كانت نوارة عينايا سميتها احلام بالك يجي نهار و تحققلي احلامي و كملت جبت طفل ... احلام كانت لكبيرة و علمتهم المساواة بينها و بين خوها و علمتها باش تحلم و توصل للي تحب عليه و حلمت احلام بحلمة و قاتلي يا ماما نحب نولي طبيبة و نداويلك جروحك و نصلحلك عمرك الي تفنى كنت نرا في احلام كينها انا وقت الي كنت صغيرة قريتها و عاونتها باش توصل للي تحلم بيه شوفت الى احلام تنجم تحققلي حاجات كنت انا تمنيت نوصللهم
بنتي السنا خذاتلي الباك و اليوم هزيتها بيدايا باش تتدخل للجامعة ليوم شعري بياض و انا نكتبلكم في هل الحكاية و الرواية ممكن بارشا منكو مايفهموهاش ليوم عمري خمسين و مازلت منعرفش علاه التونسي يخاف مل العباد على انو يحقق الي يحبو ومافهمت كان الي مجتمعنا عايش في النفاق و المسكوات في وجوه بعضنا و عمرنا ما قلنا لحقيقة لبعضنا
توضيح : انا طفلة عمري 19 و مازلت نقرى و نشالله نوصل للي نحب عليه اما نحكي في حكاية الي اي طفلة ممكن تصيرلها
درة رزڨي
Website Design Brisbane