جاني و انا في غطاية نومي,  اش مرجعك بعد ما نسيتك  ؟ انا نسيتك تي باهي ما نسيتكش أما اش مجيبك ؟  الحق ما نسيتكش أما عاملة روحي نسيتك. نخمم فيك بالدرقة و نسب فيك بالجهار.  أما لتوة نتنفس فيك ليل و نهار. قلبي يجبد على اليمين و مخي يرجعو على اليسار. قلبي يقلي "يا بنتي زايد ما عندك بلاصة كان ليه هو" و مخي يقلي "أرخص منك ما فماش".

أنا  نسيتك تي باهي ما نسيتكش أما اش مجيبك ؟ هو هو ما تبدلش, هزيتو و حطيطو من راسو لطراطش ساقيه, ناقف في كل بلاصة من بدنو نطير في الوحش, نفس الطول و نفس الوهرة, نفس الخزرة إلي في جرتها حبيتو, نفس التبسيمة إلي عاودت ذوبتني كيما أول مرة ريتو, نفس الخشم ديما لفوق ما يطيحو شي, ما تبدلش و ما كبرش صغير و ترنكوش , نفس اليدين إلي مشطولي شعري و مسحولي دمعتي, نفس الصوت إلي كنت نقوم عليه نرقد عليه, نفس الصوت إلي يواسيني و إلي يعاركني

أنا نسيتك تي باهي ما نسيتكش أما اش مجيبك ؟ هو قربلي و انا شميت ريحتو, هي هي ريحة الرجولية, ريحة ما شميتها كان فيه, ريحة ستانس بها خشمي و تغذات بها روحي, زاد قربلي و حط يدو على خدي, رجعت بنية بنت عشرين, نسيت السنين إلي فاتو, نسيت علاش مشى و كيفاش جاء, نسيت الدنيا و إلي فيها, زاد قربلي و باسني على شفتي, شفاني من مرضي, روالي عطشي و دوالي علتي, انا في فرشي أما حاسة روحي في سابع سماء, سحابة تدي و ترد حطيت يدي على قلبي و قلت ننسى إلي فات, هو توة جاني شفاني و داواني و كيما قال مخي أرخص مني ما فماش, انا نقلكم ردني طفلة صغيرة فوق سحابة و انتوما تقولولي ما ترجعلوش ؟ سبوني و كان تحبو اقتلوني أما نموت  بين يديه

حليت عيني, انا في فرشي, الدنيا دحسة و هو ... موش هوني, يدو موش على خدي, بوستو تمسحت و حتى ريحتو فيها كل شي إلا ريحة الرجولية, كنت نحلم و ما نشعفش, حتى انا ما خص عقلي, مشى و لتوة لا نعرف علاش, ما عليهش ملام أما ينعل بو الحب!!!!