انا طفلة متحررة قارية متثقفة نحب ساعات نقرى كتب نقرى ارتيكلووات، عمري اربعة وعشرين سنا مزلت كيف تخرجت، عندي اصحابي ملليسي مالفاك، ندافع عالمرا ونآمن اللي هي ماتخلقتش للقضية وللكوجينة وللدار،

تآمن الي المرا لازمها اكون قوية باش تبني جيل وتكون عندها مكانتها فالمجتمع، نآمن بحريتها وسورتو تمردها عالواقع الي عايشة فيه وعلو مجتمعها الذكوري، نتنبز من اي واحد يسب المرا فدمي ويبدا يحكيلي على العادات والتقاليد المتخلفة والشرع الي حلل اربعة وميخاولوش حتى يقولو غير هكا،

نتنبز حتى كيف نشوف امي النهار الكل تطيب وتقضي وتخمل وتغسل ونهارت الي تتعب ومطيبش فطور يعجب بابا النبز الي تاكلو من عندو! انا نحب الشيخات والتفرهيد والتحواس، وانا صغيرة كان بابا يخدم فالتوريزم، كان فرحان بيا شيء كبير،سماني سحر على خاطر كان يمشي للصحرا دوز توزر الشبيكة تمغزة جربة القروان طبرقة سوسة مستير، الي تحب انتي البلايص الكل هزني ليهم وانا صغيرة معاه، ومع هذا الكل كان حزار،يمرجني حتى كان باش نمشي نراجع بحذا صاحبتي ممنوع،

خلي عاد الرحلات والتحواس! ناكل طريحة كان نجبدلو عليهم يقلي ماني هزيتك ماتمشيش لا مع اصحابك لا مع حتى حد، كبرت انا وهو خرج روترات وديما نحب نخرج ونتفرهد، مانيش باش نمشي فالغلط جوست نتفرهد،

ديما لا الكلمة الي نسمعها منو! فاتو الايامات وحبيت طفل كيف خرجت للفاك، قعدت معاه لليوم اربعة سنين، كان فيهم برشا مشاكل وكان فيهم حب زادا! مشكلتي معاه الي هو ولد ريف، موش معناها ولد ريف معناها خايب والا حقرتو والا غيرو، ابدًا! نموت على حزارتو وعلى دلالي وعليه ودلالو معايا، ساعات يبدا كيف الطفل الصغير البيبي عندي! اما مشكلتي معاه الي هو ديما يعكس فيا، تصروفاتي مع صحابي رغملي عاملتلهم حدود، شنوة نهبط كان تصاوري كان كلام عالمرا فالفايسبوك، يقلي ماتهبط شيء رغملي حكاية تافهة هاذي، كيف نحكي واندافع على حرية المرا والحاجات الي نآمن بيهم نحسو يتنفرز ورجوليتو تتمس! ميحبش الدخول والخروج ويحب يعيش كالرجال الكل على كيفو منغير لانسالو لاوين مشيت ولامنين جيت ولافاش تعمل ولامع شكون!

يحبني مرا متاع دار، كيف نحكي معاه والا ناقشو ديما نوفارها بعركة ويقلي تافهة! نكره روحي كيف يقلي الكلام هذاكا ونقول شمصبرني عليه اما نحبو فوق الي تتخيلو! حنين مزيان كيف الناس يشوفونا مبعضنا يقولولنا محلاكم مواتين بعضكم كيف نعنقو ونحط راسي على صدرو نحس روحي بنية صغيرة هاربة مالدنية المعكوسة، كبابلي في خدمتو بنا روحو بروحو! اما يحب روحو! كيف يقلي اعمل حاجة نقلو علاش يقلي خاطر يلزمني نفهم يقلي يلزمك تقلي الله يبارك وتعمل الي نقلك عليه وتسكت! واي حاجة نقلو علاها يقلي انا راجل! وهذيكا اكذر كلمة نكرها فالدنيا! على خاطرو قعدة نتنازل على برشا حاجات تمنيتهم في حياتي كيفما الفلوس الدار العرس الكبير الي طول عمري نتمناه واللبسة والتفرهيد وغيرو خاطر حالتو على قدها، نقول توا نخدم ونعاونو! وفوق هذا الكل خايفة لا بابا ميوافقش عليه..

طبيعتو وطبيعة بابا كيف كيف، اما هربت من هذا جيت لهاذا وقعدت كالكورة بيناتهم وبين المجتمع الذكوري بعاداتو وتقاليدو وتعصبو عالمرا الي ماشي في بالهم سلعة! نخمم نقول نعيش حياتي وطز فالكل اما منجمتش نبعد عليه! نحبو خاطرو عشيري ومسميتو ولدي الكبير ومولا بيتي! تخمامي انو بابا موش باش يوافق على حكايتنا خاطرو ولد ريف وماعندو شيء و انا تفلة بركا يحب يتهنا عليا وتخمامي الي حتى كان كملنا باش يتعبني في عيشتنا قتلني! اما منجمش نبعد عليه وهو كيف كيف! الحكاية مزالت موفاتش وصعيب كان توفا!