توّا عنّا شهرين مع بعضنا.. شهرين ملّي دخل حياتي و يا ريتني ما خليتو يدخل..

حياتي كاملة نتمنّى كان في حاجة وحدة؛ نكون مع واحد يحبني.. يعشقني.. ما يرى في الدنيا كان أنا و ديما نقول نتمنّى ناخو واحد    يحبني أكثر ملّي  أنا نحبّو.. مازال بكري باش نوصل نحكي عل الماخذة! خلّينا في توّا...

قتلكم نحب واحد يحبني أنا كهو! ماني طالبة شي آخر و خاطر نعرف روحي مغيارة برشا و ما نحبش شكون ياخولي حاجتي و لا حتّى يقربها ديما نأكّد عل الحكاية هذي..

يدور الزمان و يدور و نطيح بيه، واحد كيما نحب.. مانيش باش نحكي عليه برشا أما في كلمة "محلاه" والله محلاه

أما محلاه كي يبدا ناسيها و موش يفكّر فيها.. محلاه كي يبدا معايا بقلبو و عقلو .. محلاه كي نحسّو قريب منّي كي روحي! نفرح نطير أما من داخل فمّا حاجة ديما تقلّي "ارتاح غدوة أوّل ما تتحيّر مواجعو يبعد و في دوّامة يخلّيك.. يا مسكينة راو قلبو موش ليك"

نقول لا المرة هاذي نساها و ماعادش يخمم فيها و أنا مازلت نحكي نلقاه تقلب عليّا!  ـ ياولدي شبيك؟  ـ شي!..  ـ آش فمّا؟  ـ شي!..  ـ باهي أحكيلي بالك نعاونك؟ ـ لا لا والله شي!
وقتها نفهم من سكاتو و تنهيدتو و سرحتو و بهتّو إلّي هوا معاها و مخو سارح فيها.. و مانحكيلكمش على السكاكن إلّي تتغرز فيّا وعيني ترا فيه ما يرى كان فيها، نار تشعل فيّا و مخي يبدى يهز و يرد يا ربّي آش عملت في حياتي باش يصيرلي هكّا! (لا محالة نعرف و نستاهل..) أما صعيبة واللّه صعيبة و قد ما نحكيلكم عل الوجيعة مايحسها حد و ما يحسّ الجمرة....

نحسّ روحي تفشة و الله بلا قيمة و لا هو قاعد يرى فيّا و لا نسوى حاجة .. لا نسوى عندو و لا نسوى عند روحي و نكره روحي و نقول آيه نستاهل ماني بلا خشم و لا كان جيت مرا راني هزّيت روحي و مشيت من أول مرّة قتلني فيها أما آنا قلت لا هاذا إلّي باش نحس معاه بقيمتي و باش نحيا معاه من جديد.. لقيتو في النهار يقتلني 100 مرّة! لقيت روحي لا عاد عندي ثقة في روحي و لا في

كلامي و لا في فعلي ، نخاف نعمل حاجة نفكرو بيها و أنا همّي الوحيد نسّيه فيها

و تقولولي كي إنتي ما تحبّوش آش لزّك؟! أنا نقلكم قابلة بلّي عطاهولي ربّي و هاني توّا قاعدة نخلّص بيه في غلطة عملتها قبل معلّي كنت نقول عليه "حب حياتي" .. كي تعرف حاجة

موش ليك ما تدورش بيها ملّول! أنا عرفتو خاطب و كنت أنانيّة و كمّلت معاه لين خلّيتو يعشقني و يعبدني عبادة كيما هواّ كان يقول.. و أنا شايخة طايرة بالفرحة نعرفو موش ليّا أما قلبو لياّ! يزّيني.. و خطيبتو تبات اللّيل تبكي و تقلّو مخك وينو و قلبك وينو؟ آش بدلك عليّا و هوّا يطفّيها و يكمّل يهرّ معايا أنا.. حبّو! أما أنا كي بديت نغرق و بديت نحس في روحي ماشية لطريق مسدودة و قتها بديت نفيق و بدا ضميري يأنّب فيّا عارفة روحي ملّول مانيش باش نكون حلالو و لا عمري كنت بنت حرام باش نفك حاجة غيري.. حبّيتو.. حبّيتو يمكن حتّى أكثر ملّي يستحق أما يزّي هبلة .. نزوة .. لعبة .. إلّي هوّا لازمها توفا و لازمني نفيق على وضعي و فقت و قصّيت كل شي وحدي و تعبت و بكيت و تعذّبت ليالي أما كنت متأكدة إلّي أنا في الطريق الصحيح و ما يلزمنيش نخمّم حتّى بيني و بين روحي باش نعزر ورايا..

توّا ثلاثة سنين تعدّاو الحمد لله ماعادش حاسّة بشي .. بريت! أما لقيت روحي مع واحد لعب نفس اللعبة و حبها و هيّا مخطوبة و كي باعتّو لقى روحو ضايع لا روح و لا عقل! زعمة ربّي يعاقب فيّا بيه؟ أنا والله نادمة من قبل ما نعرفو نادمة من نهارة إلّي ضميري فاق و من وقتها و أنا نستغفر في ربّي و نطلب فيه يسامحني عل البكا و العذاب إلّي وجّعت بيه هاك الوليّة المسكينة .. أما يظهرلي هيّا زادا دعات ربّي باش يطيح فيّا و لكلنا نعرفو إلّي دعوة المظلوم ربّي سبحانو ما يرجّعهاش و أنا زادا كنت نعرف و توّا هاني زدت تأكدت

نستاهل! آي والله نستاهل و ما كذبش إلّي قال الدنيا دوّارة.. والله صحيحة إلّي تعملو اليوم تخلصو غدوة و هاني قاعدة نخلّص! أما صدقوني نادمة من غير حتّى شي نادمة و إن شاء الله ربّي يسامحني و مايعذبنيش بيه أكثر خاطر توّا صحيح شهرين كهو تعدّاو أما والله تعذبت فيهم عذاب سنين و نعرف إلّي شهرين حكاية فارغة باش تفصّخ فيهم حب سنين .

أنا باش نضحّي معاه.. خاطر كان إلّي أنا جرحي تلم هو جرحو مازال محلول و أقلّ نسمة تحيرو .. باش نضحّي خاطرو كي يبدا ناسيها يبدا محلاه، باش نضحّي خاطرني أكثر وحدة تنجّم تحس بيه خاطرني تعدّيت بلّي تعدّى بيه .. نفس الحب نفس الهبلة نفس النّزوة و نفس الوجيعة.. أنا بريت و نعرف إلّي لحكاية تحب شويّة وقت و برشا برشا صبر هاكا علاش نحب ناقف معاه خاطر موش بالسّاهل باش وحدة تفهمو و تعذرو و تصبر عليه.. نحب ناقف معاه خاطر حاسّة إلّي ربّي بعثني ليه خاطرني موجوعة نفس الوجيعة قبلو و ربّي بعثو هوّ ليّا باش يعاقبني بيه..

حاجة وحدة ربّي يقدّرني باش ناقف معاه و يعطيني الصبر و وسع البال خاطر قدّامي خدمة كبيرة و مشوار طويل متاع ذل و تمرميد .. إن شاء الله يرالي بيه بركة! و الله خايفة تقعد عايشة معانا.. خاطر يا تموت هيّا.. يانموت أنا