أحمد.. أحمد.. يا أحمد قوم..

قوم عندي ليك برشا كلام، قوم وما تخليهمش فيك شامتين..

تمنيت كان فرغتلك قلبي من قبل، وحكيتلك الي في جواجية الكل..

ربونا من المثليين نخافوا ومن الحب اكثر واكثر نترعبوا، ربونا واحنا نتخيلوا في عرش الرحمان الي يتزعزع ومرعوبين لا يطيح فوق ريوسنا..

اما من الصغرى كنت نعرف ربي رحيم مش كيما ربهم، عمروا ما خلقنا لا بش نقتلوا ولا بش نحاسبوا بعضنا.. ربي الي خلقنا مختلفين..

يا احمد قوم خلي نحكيلك حكايتي، خلي نحكيلك كيفه كنت نحب الدنيا والعباد.. وكي دخلت نقرا دروا بالانسانية زيدت آمنت وبثقافة العنف كفرت..

يا احمد قوم.. قوم.. واسمع.. وسامحني على نفاقنا..

ماني نهار فقت الي اختي مثلية، اختي الي ديما مثلت الي هي تحب الرجال، في السر طلعت تحب النساء.. وقتها منكذبش عليك، هجت ومجت وهبلت.. منعرفش علاه يمكن خاطر كذبت

عليا ولا من ربي، لا من المجتمع خفت..

هزيناها لطبيب وثنين وثلاثة، ضحكوا وقالوا حالة عادية؛ وعمرها ما كانت مرضية.. وياما نساء ورجال معرسين وبصغارهم فارحنين اما في الحقيقة مثليين ومن غزرة لعباد خايفين..

اختي، الي متعرفش الي انا مستعدة الاخطرها نكفر بالدين، كان دينهم يقول اقتل المثليين، مالا علاه ربهم خلقهم مختلفين؟! وعلاه حتى الحيوانات الي لا عقل ولا دين فيهم المثليين؟!

اختي الي نحبها كيما هي ونحبها تحب الي تحب،  اختي الي مسخفتني كيفاه بالغصة عايشة وحقيقتها مخبية..

اما انت يا أحمد اختارت تكون اشجع منهم واصرح منهم، والي على الرجلة يحكوا سمعوا بيها سمع مرة وهوما متعدين..

مايعرفوش الي راجل بكلمة، مش بقده من وحدة فكلها عذريتها ولا بحكايات القهوة على مغامرات الي شطرها مجرد اوهام..

ما يعرفوش الي الراجل هو الي تكون عندو مبادئ ويكون صادق مع روحو ومع الناس..

برشا يكرهوك، تعرف علاه؟ خاطر بمحجوبهم كشفت، وبسرهم بحيت، وبنفاقهم شهرت. .

يا احمد قوم، نعرفك قوي، وتبقى قوي.. قوم الاخطر اختي، وخوه، وولدها، وبنتوا.. الي خايفين.

قوم، عيش، هج من البلاد هذي وخليهم يتفرجوا في ضحكتك وهوما مقهورين..

احمد.. نحبك تقوم وتقرا كلامي.. نحبك تقوم..

احمد.. احمد.. يا احمد قوم!