Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

و مبعد يقولوا مكتوب

upset-man

Souha Kouki - سهى الكوكي


هي و هو الروح و العقل في بعضهم، توا 10 سنين ما تفارقوش، عرفو بعضهم في ليسي و من وقتها ما تباعدوش، قراو ضحكو لعبو كلا و شربو شطحو و هملو و هبلتهم سيبو... هو حبها بقلب و رب و على غيرها عينو ما تنجمش تشب، هي زادة تحبو و ما تنجمش تخليه، ما فكرتش حتى نهار تبعد عليه...


الثنين هي كملت قرايتها و توا تخدم، هو ما حبش يكمل يقرا، قال لا يزي لهنا فيه البركا، أما ماحبش يضيع روحو، ولى يخدم و يجيب خبزتو بذراعو، ما ياكل كان متاعو، بعرق جبينو طفل نظيف و حد ما ينجم يرخي فيه العين و يهينو...



دللها ما خلاها ناقصة شي حطها في عينيه خاف عليها لا تضيع من بين يديه ، صحيح هي تحبو كان تلقا بروحها تودو، أما العباد ديما مايعجبهم شي الناس الكل يقولولها آش معجبك فيه إنتي خير منو، هو قرايتو على دوبها حتى الشبوبية منين باش يجيبها!


هي تعرف هذا الكل و تعرف زادة إلي هو راجل يتعمل عليه، موش كيف إندادو، مستهترين و على مصلحتهم ينادو... حبها تكون مرتو أم ولادو، حبها الدرجة إنو الكل شي قرا حسابو، حتى الدار وقت يبني فيها يهزها هي الي تختار، الي آش تحب، يقلها هذي دارك كان ربي كتب، كان ما تزينهاش على كيفك شنية الفايدة منها؟... حضر روحو الكل شي يعرف أمها صعيبة و في راسها عنيدة و هو ما يحبش الغيرو يخليها روحو و عقلو فيها..


أما خسارة الي يحسب وحدو يفضلو عمرو ما توقع إلي باش يحصلو، لا كانتلو لا عالبال و لا على الخاطر، وقت كلمها باش تحكي مع أمها و تقلها راو عندي شكون نحب و جايك يخطب كان كتب، هي زادة تصدمت ما صدقتش كيف أمها قالتلها لا، فولان موش متاعك هو خدام حزام كل نهار و نهارو و إنت بشهريتك و قرايتك كارك موش من كارو، فك عليك منو عندي ليك ما خير ماتخليش روحك تتهنتل فك عليك ملي معاه باش يصير...


هي حاولت تفهّم أمها و تقلها إلي هو يحبها و هي زادة تحبو 10 سنين عشرة موش ساهل يتنساو و مالبال يتمحاو، أما أمها هذا الكل ما يهمهاش ما يعنيهاش قالت أنا قلت لا و بعدها حتى كلمة ما تتعطى، خطبني فيك ما خير زين و عين و مال و ظاهر فيه رجّال، باش يلبسك الريش و يخليك في القصورات تعيش...


حاسيلو ما خلات ما قالتلها باش تغرها، تسخايل بنتها بالفلوس باش تتهنى، نفس العقلية عند الأغلبية... الطفلة ملول قالت لا و بعد حتى هي هزها الطمع قالت علاش لا، نعيش شكون يعرف عليا في العلا، حاسيلو ما نطولش عليكم الخبر هبط عليه كيف الصاعقة، يسخايلها تفدلك كيف قتلو يا ولد الناس شوف حياتك إلي بيناتنا وفا، قلبي ليك و إلي بيناتنا عمرو ما يتنسى، أما موش إلي نحبوه الكل يصير، ما نخبيش عليك أمي قتلي لا و عطاتني للغير و أنا ما نجمش نقلها لا، ما نجمش نلوي في يدها العصا، ربي يبعثلك بنت الحلال إلي تهنيك، و في قلبها تخليك، ما لقا مايقلها عينيه زغّلت بالدموع، حس بروحو مخنوق و قلبو خايف مفجوع، في كلمتين قلها ربي يهنيك.... و نهارت صداقها هو قريب يهبل ما عرفش آش يعمل، الطفلة إلي عاش حياتو كاملة يستنى فيها خلاتو و باش تبات عند غيرو، هي الفم يضحك منا لنا و هو العين تسقي العين، و من هاك النهار حلف عالبنات و حلف كان تدخل طفلة غيرها لهاك الدار



تونسية_متمردة

سهى الكوكي


و مبعد يقولوا مكتوب