و النفس تشتهى ساعات ..

تشتهى تسرح في بحر أسرار..

نطير كيف العصفور فوق شجرة منسية في غابة مافيها حد لا طير يطير و لا تسمع فيها حس صغير ..

و النفس تشتهى ساعات..

نسرح كيف القطوس في شوارع ظلام نغزر و منتراش و كان تراني مترى مني كان العين الحمراء تلمع في وسط الظلمة..

و نشتهي ساعات كيف الحوتة ننسى.. و محلاها كيف تنسى.. تنسى الحلمة اللي خلاتك و العباد اللي نساتك و الناس العايشة، أما قلوبها في وسطها ماتت..

نشتهى نضيع في ثنية منعرفهاش.. نطير كيف الورقة اللي رماتها هاك الشجرة في الخريف.. و نتبع الهواء و نترمى.. في عروق واد يفيع نتبعو و يوصلني لحلمتي، لضحكتي، لدمعتي اللي

راها الغريب و مفهمهاش القريب..

و نشتهى و نشتهى و نشتهى و مكثرهم شهواتي.. و مكثرهم حلماتي..

نحل عيني نلقى بدني هنا بارد سارد.. روحي خلاتني و سرحت في دنيتها..

ساقي مشات عكس ساقي..

كلامي تخنق و فومي منطق..

قلبي تملى و سكاتي محكى..

و نعيش عام، عشرة و 100 و دوبة نفارق هالدنيا نتنسى..

و النفس تشتهى..تتنسى..

و أنا نفسي تشتهى.. ساعات..