شبيك هاكة وليت ؟

شبي ڨلبك كساح ؟

شبيك تبدلت ؟

شبيك معادش كي قبل ؟

شنوة ألي تبدل فيك ، كل شي تبدل فيك طبيعتك كلامك تصرفاتك حتى الحاجات الي تكرهم وليت تحبها ؟

شنوة صارلت !!!! ويني هاك الطفلة الصغيرة ألي ضحكتها لأخر النهج و جريها و ركيضها و تعنيقتها و فرحتها كي تراني و ويني بوساتها و شهواتها كي تقربني ؟ ويني ؟ ويني الصغرونة ألي كنت نعرفها ألي علمتها ربيتها ووريتها و قريتها ؟

ويني ألي فرحتها و ألي واسيتها ؟

شبيني معادش حاسس بيك توة ؟

- ولا أنا حاسة بيك أنتي !

و لا حاسة بلهفتك و نبرتك و لا حاسة بشهواتك و لا عنقنتني و غرقتني ببوساتك ..تحب تعرف شصار ؟

شصارلنا ؟

أنا معادش صغيرة معادش حنينة معادش حب و لا عاد ليا جهد باش نحب و لا عاد عندي قلب يغني حب و لا عاد نحب نحب الحب و لا عاد نحب نكتب عليه و نشتهاه و نرويه ، أنا معادش صغيرة كنت عايشة في حلمة حلمة رسمناها حبيناها و عشقناها حلمة شجعتني فيها على كل حاجة نحبها من فرحتي طرت و جنحت بيك لين الناس سمعو بيك و حسدوني فيك و في لخر بعدوني عليك

طرت و طرنا الٱثنين جنحنا و طرنا لبعيد تحبني و نحبك سهريات لصباح حكايات تتروا تواسيني و نواسيك و من نسمة البرد نخاف عليك كيما خفت عليا كيما سيستني و تحملت ميزاجيتي كيما قريت كتيبتي و نطقت حروفك بشفايفك و قلبك كيما تحلمت غيرتي ألي ياما خبيتها عليك ياما خفت منها .أما بنبرت صوتي تفضحني !

أنا فقت مالحلمة ؛

تي سيبني نعيط و نصيح نكتب و نكتب و نزيد نكتب سيني مدام ملقيتش نفس يخرج مالفم و لا لقيت حروف ننطقها

لقيت كان بسكات نرويها فم ساكت و عينين تشوف و يدين تكتب و صوت من داخل يبكي و يتحصر..

معادش صغيرة ..

معادش كيما كنت تعرفها من بعدنا تعلمت الي مافمة شي يدوم و يجي نهار و غصرة و تتعدا و الشدة تزول

هي الي في غصرتها ضاعت اي ضاعت ؟

ماشي في بالك ساهلة تكون قوية ؟

ماو من ضعف تتولد القوة و من بكاء تتولد العزيمة

و من غصة تتولد حلمة جديدة

مش ساهل ننسى ولا ننساك و لا ننسى الفرحة معاك و الضحكة المشركة الفم و لا تهلويسي على وشمة علئ الصدر و لا على حمرير حملتهولك و كحل رسمتهولك و لا علئ وجه فرحتو

كل مايبدا يستانا فيك

تجيني و نجيك .

.مش ساهلة ننسئ أما مش صعيب.

يجي نهار ؟

يمكن غدوة

يمكن الي بعدو و الي بعد بعد بعد بعدو

البكاء بهاي

نهار اللول الثاني الثالث أما الرابع يبطى

نمسح الدموع و نقول شبيني بهلولة ؟ بهيمة ؟

حكاية و حلمة و لانا الزوز لبعضنا علاه حزن الي زرعتو علئ الفراق ؟

باش نقوم مالفرش نشعل الضوء و نضوي بيتي الضلمة باش نجب مكياجي باش نحمر اما معادش ليك لروحي الي هي انا باش نكحل اما معادش ليك لروحي باش نضحك و نبوس روحي الي

باش نشوفها في المرايا باش نعشقها و نربيها من نسمة البرد ندفيها و نحميها ...

تي كهو عاد كبرت ماك معادش تحبني صغرونة ...

حتئ لخيال ليه حدود و يزي مافتنا لحدود الانثين

خلي الدمعة تسيل علئ الخد نهارين

و من بعد الضحكة باش تترسم لروحي

قدامي ثنية باش نخطيها وحدي باش نعيشها وحدي باش نصورها وحدي باش نتعلم نمشي في ثنيتي وحدي

يزي ماددشت بيا كي بنتك*

حتى البو ينجم يجي نهار و يمشي و يخليك

كيما الام تجي نهار و تمشي و تخليك

تبقا ذكرئ حلوة فيها حسرة

لا تنجم تنكر جميلهم و لا وقفتهم

كيفك كيفهم

كنت عزيز علئ القلب

حكاتلك حكايات تخابات علئ البو و الام

قربتلي اكثر منهم

اما علمت روحي الي شي مايبقى لزمني نبكي نهارين مانيش حجرة

و مش ساهل ننسا الي كانا

تتذكر كلمة كنا محلانا ألي تنرفزك تي ذكريات لازم تتمحى

اما روحي قبل كل شي

روحي الي قتلتها و سال دمها و عينين حواقو و بدن تعب

حبتلي وقت نداويه

اما مافمة شي صعيب ..

تي لااباس و ديمة لاباس !

الليوم انسانة عديمة احساس ڨلبها كاسح يزي معطات و ماخذات شي جا وقت باش تاخو و ماطعتيش . .

نحبني من جديد !