Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
هيّا نعيشوا
Belkiss Naski - بلقيس نصكيإيجَا..
إيجَا نُهْرْبُوا مالعَالَمْ وْ دُمَّارُو..
نَعْمْلُوا جْوَانَحْ وْ نْطيرُوا و نْعيشُوا الحُبّ وْ نكْتَشْفُوا أسْرَارُو.. َ
آنَا ليكْ و انْت ليَّا..
و شَيْ مَا يبَعّدْني عْليكْ و يْبَعّْدكْ عْليَّا..
و نْكُونُوا قَيْس و لَيْلَى وَلَاّ حَتَّى رُوميُو و جُولْييت..
مَا يْهمّشْ.. نْحبّْ مْعَاكْ نْعيشْ و نْكَمّلْ الأَيَّامَات..
نْحبّْ فيكْ صْفَاوةْ قَلْبكْ و بْهَاوةْ رُوحك..
نْحبّكْ تشْكيلي هَمّكْ و نْدَاويلكْ جْرُوحك..
نْحبّكْ جْرَايْني و آنَا الكَمَنجَة..
انْت.. انْت كَاهوْ تَلعَبْ بأَوتَاري..
و تَعْرف أَسْرَاري..
و عْلَى كتْفكْ نْميل..
و نْغَنّي و نْحسّْ بْكُلّْ شَيءْ جْميل..
نْحبّكْ الأَرْضْ و آنَا الشَّجْرَة..
بيكْ و فيكْ نْعيشْ و منْ حُبّكْ مَا نَبْرَى..
نْحبّكْ فَلاَّح و أَنَا أَرْضك..
نْحبّكْ بَحَّارْ و أَنَا بَحْرك..
نْحبّكْ مُؤْمنْ و أَنَا رَبّك..
و اسْمي منْحُوتْ في عَقْلكْ وْ قَلْبك..
لاَ نْحبّ لاَ جَاهْ وْ لاَ مَال..
تي إيجَا وَحْدكْ نَعْرفْ اللي مْعَاكْ يرْتَاح البَال..
و يْنَوّر قَلْبي و تتْفَتَّح رُوحكْ و تتْحَسّنْ الأَحْوَال..
إيجَا نحلْمُوا و نَصْنعُوا عَالَمْ نْعيشُوا فيه..
عَالَمْ لينَا آنَا و انت نَضْحْكوا و نْغَنّيوْا و نْحبّكْ و تْحبْني فيه..
إيجَا نبْعدُوا عْليهُم..
تْعبْتْ منْ حسّْهُمْ و جُوجْمتْهُمْ و الشَّرْ اللي خَارجْ منْ عينيهُم..
هُومَا.. اللي سرْقُوا الأَيَّامْ و اغْتَصبُوا الأَحْلاَم..
هُومَا.. اللّي حَرْمُونَا مالدّنْيَا و مْعَاهُم كْبرْنَا منْ كُثْر التُّخْمَام..
تي إيجَا ننْسَاوْهُم..
و نْعيشُوا دنْيتْنَا بْعيد عْلَى أحْكَامْهُمْ و كلْاَمْهُم..
هُومَا.. اللي الحُبّ عَنْدْهُم رْخيص..
و عالنّْسَاء قَالُوا أَهْل جْهَنّمْ و زَرّيعة ابْليس..
هُومَا.. اللي يْقيسُوا الرّْجَال بالمَال..
و نسَاوْ اللي الفَايْدَة في المْحَبَّة و بْهَاوةْ الأَفْعَال..
إيجَا.. تْعبْتْ و آنَا نسْتَنَّى..
كُلّْ يُومْ نْقُولْ اليُومْ و قَلْبي مَازَالْ يتْمنَّى..
يْجي نْهَارْ و نْشُوفكْ يَاللي رْسَمْتكْ في خْيَالي..
و مَا جيتْني كَانْ في أَحْلاَمي و سَاعَاتْ كي يْطيرْ عْليَّا النُّومْ في عزّ اللْيَالي..
هَيَّا إيجَا و خَلّيني نْشُوفكْ و نْمسّك..
قْبَل ما يَاقفْ الوَقْتْ و يمُوتْ قَلْبي قْبَلْ مَا يْحسّك..
بقلم بلقيس نصكي
Website Design Brisbane
Tags: