وقت اللي تلقى روحك انتي وحدك اللي تحاول، و انتي وحدك اللي تضحي، و انتي وحدك اللي شادة صحيح و ما تحاولش تخلي أسباب صغيرة و ممكن حتى تافهة تأثر فيكم، في وقت اللي الطرف الآخر مش عاطي هذا الكل حتى قيمة و حتى أهمية و هو بيدو الأيباب التافهة اللي انتي تحاول تصغرها قد ما تنجم تلقاه هو يكبر فيها...

كي انتي تاخو منها موقف يستعرف بيها حاجة صغيرة، و كي تجي على حدو... تاقف الدنيا... و الأخيب، إنو مش يعمل في نفس المجهود اللي انتي تعمل فيه... تراه متملحو مش واخذ بعين الإعتبار شيئ من اللي تعمل فيه و يحسسك زادة اللي إنتي آخر همو... آخر حاجة يخمم فيها...

توجعك... تبكيك... تخليك تخمم و تعاود التخمام...

تقول علاش ؟!! ... و ما تلقاش جواب... تقول شبيني ما نعملش كيفو أنا زادة ؟! و وحدك تجاوب روحك و تقول " أما أنا قلبي ما يعطينيش... ما نجمش... " طاح الفاس في الراس تو و فات الفوت...

تخمم بش تخلي كل شيئ كيف ما هو و تمشي... تخليه و تمشي... تفول هي وجيعة وجيعة... و من بعد تقول اللي فما وجيعة أهون من وجيعة...

تسأل روحك علاش ما تنجمش تاخو موقف ؟ علاه تخلي غصتك في قلبك ؟ ترضى تاكلها إنتي في عظامك ميسالش، أما اامهم بالنسبة ليك هو ما يتقلقش، ما يتغشش، و ما ياخوش في خاطرو...

تلقى روحك تخمم فيه و في راحتو قبل ما تخمم في روحك و راحتك ، لا حتى و ناسية روحك و راحتك على خاطرو....

تقول " هو روحي و ميسالش الفايدة هو مرتاح... "

و هو ؟ و إنتي ؟ زعمة يخمملك كيما تخمملو ؟ و بخمم فيك و قاريلك حساب هكا ؟ تضحك ضحكة متاع تمنييك، بالطبيعة؛ خاطر تعرف الإجابة... " و بالطبيعة لا... "

تولي تبرر و تقول كل واحد و طبيعتو... أما الحقيقة لا... مش إنتي زادة كانت طبيعتك هكاكا ؟؟ أما بوجودو وليت عبدة أخرى... ولات روحك آخر همك... و هو كل همك.... هو قبل الكل و هو الكل في الكل...

راحتو الأهم و بالأخص المهم هو ما يتغشش... و حتى كان انتي تغششت ولا نبزك طز فيك و تتفلق... محسوب، ما يعرفك بش تقعد تقعد  و ترجع تكلمو... و حتى كان يعرف روحو غالط في حقك... و يعرف روحو بكاك، خاطر يعرف دمعتك قريبة و فيسع تبكي أما والله لا يخسر عليك حتى تاليفون بش يتفقدك ولا يصبرك و يواسيك حتى بكلمة، مش حتى بش يطلب السماح... خاطر هو ما يطلبش السماح لو كان على قطع رقبتو... يخليك هكاكا... تغلي و تتقلى و تاكل في روحك ماكلة و هو... ولا همو فيك...

تقول علاش ؟! ياخي لادرجة هاذي ما عندي حتى قيمة أنا عندو ؟ و علاش ما نعملش لروحي قيمة ؟ علاه ما نجمش ؟!!

و من بعد وحدك تبرد... ما تنساش... أما كي كل مرة... تخلي هكا الكل على جنب و تقول ميسالش... لازم واحد يضحي... و ترجع تصبر في روحك و تبررلو...

و قيد على " نحبو " و " يهون " ...