في عيدك اش بش نهديلك, انا عارفة إلي بكنوز الدنيا ما نوفيلك, خممت, مخي تشوشط و حرت

نهديلك سنين صغري و عمري إلي جاي حتى الاخر نفس فيا ؟ لا لا شوية عليك

نهديلك قلب مقربط بقربيطة حمراء مليان محبة و معزة ؟ لا لا شوية عليك

نهديلك صبية عاشقة ؟ ماهو يقولوا  إذا عشقوا الصبايا يا سعدي يا هنايا, لا لا شوية عليك

نهديلك كتف تتكى عليه وقت الشدة ؟ الدنيا صعبت و ما فيهاش أمان , لا لا شوية عليك

نهديلك يد حنينة تكبش فيها كيف تجي  اطيح توقفك على ساقيك و تزيد إتطبطب عليك ؟ لا لا شوية عليك

نهديلك شمعة إتظويلك لياليك تنورلك طريقك و تحميك ؟ لا لا شوية عليك

نهديلك دعيوة خير خارجة من قاع قلب عايش ليك ؟ تي ماهو تاقفلك نهار من نهارات. لا لا شوية عليك

نهديلك غناية نكتبها بيدي ؟ نخاف صوتي ما يوصلهاش و إنت فنان و تفهملها, لا لا شوية عليك

نهديلك عجايب الدنيا تسحرك , تي إنت بيدك عجيبة, لا لا شوية عليك

نهديلك قصر الدهشة و عيشة أمراء ؟ نعرفك دويرة معبية بالمحبة و القدر يعيشوك سلطان في زمانك, لا لا شوية عليك

نهديلك ضحكة طفلة صغيرة تنسيك في  الدنيا و ما فيها ؟ ضحكتك بركة تتحط على الجرح يبرى. لا لا شوية عليك

نهديلك تاج مرصع ديامنت و لويز ؟ شتعمل بيه إنت  تاج راسي انا, لا لا شوية عليك

نهديلك القمرة ولا النجوم ؟ خليهم مزينين السماء و هيا نعسو عليهم مع بعضنا كيف ما يجيناش النوم, لا لا شوية  عليك

نهديلك وحش على  قد وحشي ليك ؟ برشة راهو .. نخاف نزيد على ما بيك, لا لا لطف عليك

نهديلك قفة بالبوس, تجبد منها وقت ما تشتهي ؟ ما يساعدنيش ايجا نبوسك مني ليك, لا لا شوية عليك

... خممت خممت و عرفت اش نهديلك في عيدك .. بش نهديهملك لكل و موش خسارة فيك, هاذم لكل ما يجيو شي قدام محبتي ليك. ربي يفضلك و لا ينحيك

" جو تيم علولو "