Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

نهار لمْرا

femme-fatigueeSonia - سنيا

ليوم قالو نهار لمرا ، كيفاش عرفت؟ دوب ماقمت كرايمي مكسّره معدتي عليّ عاصره لافرّيتو ليل لا نهار ،عين مسكّره و عين محلوله دوبلّاش ، زوز صوابع بالوجيعه معبّين والباقي لربّي متشفّعين . في الرّاديو صوت راجل يمجّد فينا و يعلّي و ينفخ فينا ، قالك روحهم فينا ،قلوبهم لينا ،يحبّونا و هدّه في إديهم إلّي يخمّمو يمرمدونا و يضربونا ...

ليوم قالو نهار لمرا ، كيفاش عرفت؟ راجلي جابلي ورده مالجّنينه معبّيه نمّال و زوز كيلو لحم و كبده و عصبان ، إنزل علتطييب في الكوجينه و مادامو نهارك طيّب لينا ماكله بنينه مقارن و كسكسي و مرق و كثّر مالهريسه .. بهيم قظيه و باش طيّابه ،  بساق زرقه و زوز صوابع توكّلو لربّي ، عين تحلّت و عين تستنّى في رحمة ربّي ، الورده تطيّشت قبل ما نفرح بيها و الماكله تكبّت قبل مايشبع بيها

ليوم قالو نهار لمرا ،كيفاش عرفت ؟ راجلي تمنيك علّي حمّرو و لبسو العالي ، علّي ركّبو شوافر و هداو لنساهم الغالي، علّي قالو فيها شعر و طوّلو على خاترها الشّر ، علّي نحّاو اللّحيه و هداو للّي يحبّوها رحله . راجلي يحبّني أما الرّجوليّه عندو كفّ و مشطه ، عرك و تفسيد مشطه ، فمّ مخيّط ،قلب محيّر ، نخمّل و نطيّب ، نربّي و نكبّر ،نقرّي و نصوّر ، وهوّ بيّ يكوٌر .. راجلي يحبّني أما نرفوزي حزّار ، مالخدمه للقهوه و عقاب الليل يروّح للدّار ، عشاء بارد مكبوب ،وجه مقلوب ، صياح و شريان شبوك و الليله توفى ببدن مسبول ، بدني . راجلي يحبّني أما ساعات يقوّي في الدّوزه عليّ  يتسيّب يقتلني و في الصّباح يتسرسب ، راجلي يضربني أما يطلب السٌماح ، صيد في اللّيل و على مابنّو الصّباح ..

ليوم قالو نهار لمرا ، كيفاش عرفت ؟ راجلي ودّني بليله حمراء، دمومه و سنّين طايحه و روح طالعه و أنا نغفّق علقاع ممدوده . غاضو كيفاش نهار لمرا يتعدّى من غير مايمسّني و "يحبّني" و يحسّ روحو مالرّبوبه . غاظتّو الورده إلّي هداها من غير ماخذا حقّها ملّوطه .غاظتّو مرتو ترقد ليله لاباس ،أضرب القطّوسه تتربّى لعروسه هكّا قالو ناس بكري وأمّي قتلي عدّي بابا كان يضربها كي كانت قدّي .. عادي راجل ما يتعابش لازم إنتي لزّيتو لازم إنتي مقصّره في الدّار في الفرش في الماكله في التّربيه في التنّظيف في التّحديد في المسحان في الكنسان ... لازم كثّرت في الكلام في الملام في الدّلال في التزعبين في الشّهاوي .. لازم تقلّق منٌي خاتر نتنفّس !!!!

قلتولي مالا ليوم نهار لمرا و الرّجال حمّرو على خاترنا ؟ حمّرتو باطل سوّكتو باطل يا جماعه لا تقصّ العنف و لا تربّى الرّاجل..

بقلم سنيا


نهار لمْرا