عمري ما كنت نتصور حياتي تكون مرهونة في نهار, نبدى نستنى فيه كيف الطفل الصغير إلي مدة ما راش بوه إلي توا شهور عايش في الجبل بش يحمي بلادو,

والا كيف البنوتة الصغيرة إلي أمها وعدتها بلبسة جديدة كان تجيب معدل باهي, نستنى كيف الفلاح إلي تعب و دعى بش أرضو تعطي خيرها و يوكل صغيراتو, نستنى في نهار السبت كيفهم.

أنا نحبو نهار السبت خاطر نشوفك, نبوسك و نعنقك فيه, انجم  نمسك, نشمك و نطير وحشة حتى شوية سوايع و إلي هوما ما يجيو شي قدام السوايع إلي ستنيتك فيهم و تمنيتك تكون فيهم معايا.

نهار السبت عيد عندي انا, عينيا مرشوقين فيك قول علي بش نموت غدوة, إي نعم نموت و نحيا و إنت موش هوني.

نهار السبت نوارة ذابلة و نتفتح, دار متروكة ننفض غبرتي و نحل شبابكي, شميسة نطلع بعد شتاء بارد في سماء مغيمة تجيب الكبي, مولود جديد يستنشق أكسجين أول مرة,
ربيع انور و نشم نسمة بنينة, عصفور نحل جوانحي, ما نرقدش نبات نحسب في نجوم و نحكيلهم عليك يونسوني حتى يطلع الفجر .

و ساعات تعملها فيا و ما تجيش …  تشمت فيا أيامات الجمعة لخرين إلي غايرين من نهار السبت, نخبي حويجاتي إلي حضرتهم, نمسح حميري و نقعد نستنى في السبت الجاي !

يمكن جمعة في عينين الناس شوية أما الوحش يهد الظهر ,يطول الدهر، يهرينا, يتعبنا, يقتل فينا حاجات, نوصلو نكرهو و ننقمو على الظروف إلي فكتلنا حبيبنا. ويمكن زادة يزيد يقوينا و يخلينا نصبرو على إلي كتبتو الأيام لينا.

على فكرة غدوة سبت و انا فرحانة و نستنى فيه بالدقيقة و الدرج ..