نشآلله العاقبة ليك.. كلمة قتلت أحلام الصغر كلمة زادة في مرارة الدهر .. كلمة دفنت الحلم و الإبداع و زادت مع الهم أوجاع.. يحبونا كيف كيف حد ما يخرج ع المعتاد خايفين لا نضيعوا في عناد.. يحبونا كيف كيف ناكلو كذف كيف نقراو،نلبسوا، نرقصوا ، نتمسرحوا كيف كيف ..

نفس المنظومة.. ع حالها ناوية تعيشنا جرومة.. يحبونا نتبعوا نفس السيستام.. فيبالهمش قاعدين معيشينا في أوهام.. كي تهنيه على العرس يقلك العاقبة ليك.. شكون قالك ناوية نعرس !؟ تهنيه خاطر خذا الدكتوراه يقلك نشآلله العاقبة ليك .. شكون قلك ناوية نعمل طب .؟! و قيس على هذا كل طلب .. تقرى ، تثقف ، تتطور تولي عاهرة و منعوتة بالصبع..

ووراك تجري الكلاب الجيعانة.. لي لاما حالة مخاخها عريانة.. يستناوك في الدورة ناويينلك على عثرة .. تقوى عليهم أقرى و إنجح من غير غدرة.. راك مرى و مش باهيلك الدز و اللز .. فكرك حامي ها البلاد .. و حنانتك سند لها العباد .. قد ما تعمل تقرى ، تثقف ، تخدم .. ديما يسعاو يخليك تندم..

العاقبة للباك العاقبة تشري فيلا و حتى كان تبدا عايشة في قصر.. العاقبة تبني فوق الڨمرة.. العاقبة لكل شيئ.. المهم ما تفرحش بلي نتي فيه .. ديما فارع وٱتكربص بش توصل للمرحلة لي بعد.. قتلو فينا روح التميز و الفن.. كل يوم يزيدوا يعيشونا في عفن .. العاقبة ليك هي سبب تعاسة برشة عباد.. الي خلات الناس الكل أنداد.. انا نقلكم العاقبة للناس الكل ( و أنا معاكم ) .. تخرجوا من ها القالب و ترسموا حياتكم.. وقتها برك تنجموا تشوفوا عباد تفرح الصباح.. و معاها مخاخ الناس تزيد ترتاح.. وقتها نجموا نشوفوا الإبداع .. يزي ما عشنا في ضياع.. و وقتها تتنحى منظومة العاقبة ليك .. و معاها يتولد الإبداع فيك...