تي حتّى غشّك غالي عليّا

تحمّر أكا لعوينات يا غاير يا تنصح فيّا

تقلّي رد بالك تمشي في هاك الثنيّا

رد بالك يجي نهار و تبعد من قدّام عينيّا

راك روحي راك الدم لي يجري من راسي لساقيّا

نخزرلو مليح و نقلّو ربّي يخلّيك ليّا

يقلّي إنت لي ربي يفضلك ليّا و لا يبعدك عليّا

إن شاء الله ربي ف الحلال يكتبك ليّا و تكون بين يديّا

تكون أم صغيراتي و لي تشتهاه نجيبهولك هديّا
..
و بكلامو تحمار تحمار خُديّا

و كي يراني حشمت يولّي يتدكك عليّ

و مشات أيام و جات أيام و تلز ما تشوفو عيني

ستنّيتو ليالي ندعيلو في صلاتي

عايشة جهامة بلا روح ذبالت عيني و صفارت ضُحكتي

نحلو بيه في نومي و نتخيلو بجمبي في نهاري

"خلّت ورايا راجل", كلمتو لي قعدت في قلبي

سبعة شهور نتعلّم كيفاش نتعدّا الكاياس.. نتعلّم في الخطوة وحدي

ما نجمتش.. لا! ما حبّيتش! نحبّو هوّا لي يعدّني

...مع الوقت دارو بيّا وليدات و بنيّات حلال

قالولي يزّي ملّي تعمل فيه راهو كلّو هبال

لاك متاعو و لاهو متاعك ياخي من قلّة الرجال؟

قالولي مزلت صغيرة و أي راشل يتمنّاك

علاش تغبن في روحك مع راجل موش من مستواك

قلتلهم حياتي و أنا حرّة و إلّي شاهي شهوة يديرها في عشاه

أنا عينيّا ظلامت و كان هوّا تراه

أعتقوني! مانيش طالبة حاجة كبيرة كان نكون حذاه

هو الراجل لي ملالي عيني و بعدو تفنا الرجال