نحبّــك

Nesrine Chermiti - نسرين الشرميطي

نحبك..إيه نحبك...

نحبك قد السما و نجماتها..

نحبك قد الأرض و وريداتها..

نحبك قد شطوط البحر و رميلاتها..

نحبك خاطرك من دنيتي تخطفني و بكلمة صغيرة تضحكني

نحبك خاطرك تنسيني شقيا و همي وفي حلمة تسرقني

في حلمة مزيانة ما فيها كان انتي و أنا ما فيهاش جارتنا سعيدة الخرنانة...

نحبك خاطرك تشوفني مزيانة وأنا و الزين متعاركين ليوم القيامة..

و طريق طويلة مشينا فيها... اليد في اليد مايهمنا في حد، لا من البو و لا من الجد

ولا يهمنا نبيح الناس الي عامل مسد، إنشاء الله الدنيا على روسهم تتهد...

وقداش من ثنية في ثنية ضعنا فيها زناقي لمدينة ضحكنا، لعبنا و بكينا كيف رحلوا ماليها...

نحبك خاطرك فقري ما عندك كان أنا و ميمتك الي توا سنين راقدة في الجبانة...

نحبك خاطرك في لحظة تبكيني وفي لحظة تمسحلي دموعي و تراضيني

وتقلي يا للا البيه راهي الدنيا عاملة فيا وأنا زوالي ماعندي كان انتي سامحني يا ممو عينيا

نحبك خطرك في المنام تنادي باسمي و ساعات كي تهبل تخربش على حيوط الجيران وتكتب "هي ليا مولاة العين العسلية"

وتحلف و تقلي ما نعرس كان بيك...

وأنا نقلك يا ولدي راهي حلمة يزي فيق...

نسرين الشرميطي

Website Design Brisbane