غادة نصر - Ghada Nasr

ملي انا صغيرة حطولي حدود هذا مسموح و هذا مش مسموح حكاولي برشا حكايات فيهم لي فهمتهم و فيهم لي لتوا ما هضمتهم قالولي يزي عيب ما تلعبش بالمقص ما كانشي امك و بوك لي بيناتهم يتقص قالولي ما تكذبش ربي يهزك من شوافر عينيك ...


قالولي ما تاكلش باليسار شنوا فيها عار قالولي برشا حاجات برشا.... مشا زمان و جاء زمان و بديت نعرف في الحقيقة... امي و بابا مش مربوطين بالمقص و بيه ولا بلاش لي بيناتهم ينجم يتقص ...

ربي ما يهزنيش من شوافر عينيا اما يجي نهار و كل واحد يحصد لي زرع... اي و انا ناكل باليسار نكتب باليسار آش عملنا ؟؟؟ قال شنوا الشيطان ياكل معاك ... ياخي هو الشيطان ياكل؟؟ كذبو عليا في حاجات مش ضرورية...


هربت منهم لدنيا انا صنعتها ...دنيا محلاها فيها التصوير لي عشقتو و حبيتو.. فيها الموسيقى لي قريتها عشرة سنين و قلت هذي هي الحل هربت منهم لكمنجتي و لقلمي لي نكتب بيه لي و نصور بيه و بدات دنيا تزهى عالم محلاه ما فيهوش يجي و ما يجيش ما فيهوش حرام و حلال اما و هي فما فرحة تكمل؟؟


كيما قالو جات الحزينة تفرح ما لقاتش مطرح... كي وليت فرحانة و تخطيط الحدود لي حطوها و حبيت التصوير و الموسيقى قالولي لي التصوير حرام و ما يصور المخلوق كان الخالق ....تشويت قلت ميسالش هاني الموسيقى ياخي قالولي صوت المرأة عورة ..


قتلهم أي انا ما نغنيش اما نعزف قالولي مالا لعن الله المعازف باللهي آش خليتو؟؟ تحبو تقمعونا و ترجعونا لتالي؟؟ ولا كي هوما حرام لواه ما قلتوليش من اللول قبل ما نحبهم و نعشقهم؟؟ لشنوا حبيتو توصلو و شنوا الحل؟؟ جيت نلوج و نشوف لقيت لي  بالحق حرام و لي قالوهولي ماللول مش حرام ... آش بش نعمل ؟؟ انا نحبهم أما نحب ربي أكثر منهم.......

بقلم

غادة نصر