نحب نبكي وليت ماعادش نبكي موش العين شاحت ولا دمع رقد و يتكّى ...العين خانت في صدرها ماعادش تلقّي ..كنت مع كل قطرة ...نحس روحي لرب نزكّي ...في يتيم ندفّي ...

نحب نبكي و انا نبدل في المريول نبكي و انا ناكل في الفطور... نبكي و انا في شارع ندور..

الشارع لمعبي بالفرحة ...بيناتهم تحبي.. و عصباح تفيق معاهم تسري ...

اليدين مشدودة ....الاحضان ممدودة ..ضحكة مرسومة... و انا نبكي...

نبكي وقت الشكارة تتفلق وقت القطوس يمعوق وقت الزرع يتحرق وقت العلوش يتذبح... وقت يولدوا و الناس تتخلق..... نحب الكسكسي نهارالاحد ..

بصياحي نسقّي... بمقلت عيني نكسكس ....و نقّي ...نحب تنفيسة في الكيسان نحصحص. ..نحب نصيح و بالصياح موج البحر نزلز ...نحّي من السماء الزروقية و بدمي نصبغ ...

صوتي نخبيه ...و في القوايل نهز...في الاسواق نحط ...

نتصور فما برشا ناس عندهم مديدة ساكتة... خلي صوتي تمشمش و تذوق.. نعمل ڨرجومتي بوق ...نعيت لراجل متعدي يقطعلي الوريد و العروق.. و يلمهم في ظروف ... و انا نغزر الفوق ...

موش حكاية انا سلبي ..اما خايف من البهجة و الضحكة شنية تخبي ..

نعرف مانيش فرحان و مانيش حزين ..و مانيش بين البينين.. اانا مانيش عبد...

البشر تحس..اانا ما يحركني شئ ..ببباني مقفولة ..شبابكي مسكرة مايدخلي شئ ...

حشتي نحس.باي حاجة .حشتي نتلدغ ..نتقرس نتسكك.. نتمحص ....ميسالش حتى بالخوف.. بالحب .. بالقلق ..حتي بالوجيعة .....غير من بلاش ..كيفها كيما الفرحة ..يكون سببها عبد و لا حاجة صغيرة تجي ببلاش ...نحب نذوق مانحبش نقعد بارد ڨلاص... نحب نهيج و نتحرك وسط الموج كالغطاس ...

ماعينيش نضحك مانحبش بيها نتعود و نتعلق.. انا فقير و صومها مانيش خلاص ....عارفها غدارة باش تعاود تشلبق ..الله غالب انا خواف ..مانحبش نتفائل تفائل يخلينى برشا.. نحب برشا نصبر برشا ..نتعلق برشا ..انا اقل .. انا شوية.. انا شطر .....

يمكن ستنست بقلت النوم... و تعودت لمافماش حاجة الدوم... يمكن قاعد توا في الهم نخون.. يمكن سيبتو ..هو ليحملني صباح كنقوم ...

نحب نبكي كيما تقول امي "الدمعة قد الفولة.".. نبكي على طفل غشير ...

كل ما يجري تحت طولة ...يجري بالقوى كينو خايف من الغولة .. الغولة هي الدنيا الحولة.......

نحب نندب و من قوة النديب فخاذي تفجج ..الليل نردو كاس و نهار فيه نبزع...الفرض نردو سنة ...و سنة فرض.... الممنوع مرغوب و المرغوب ممنوع...

نحب نندب ونقلب الامان كفر.. و الكفر امان ...نفلق بدني... و شعري نردو وذني ...و ساقي زندي ...وعيني نردها كرشي....نحب نبكي اما الدموع ماتهبطش الدموع طالعة .. راسها مذبلة ..بين الريح لابدة ..

تحسها كي تتعدي على الخدود تشق في الوديان و البحور ...باش تحس بشفايفك لمعبية بالشقوق...سعات تخرّج لسانك و تذوق دمعة.. مرة تجيك جغمة حلوة.... و مرة جغمة ناقصة غلوة