مانيش عارفة اش الّي صاير فيّا

اش الّي في حيرة مخلّيني

لا عاد معبرّة الّي داير بيّا

ولاعاد لاقية شي يزهّيني

زعمة شبيني ؟

بعدٍت على الستّيلو والورقة , وقت طويل

.هانو عليّا و هجرتهم بعد عشرة سنين

لا دفيّتهم بحرارة يدّي و لا خلّيتهم في كفّي متهنّين

لا حكيتلهم الّي في روحي مخبّي

و لارويتلهم اش الّي كاين في قلبي الحزين

بعد الغياب رجعت و لاجيتهم

خاطر ذاقت بيّا الدنّيا و ستحقّيتهم

مالقيتش الّي يسمعني , والّي يملا علّيا بلاصتهم

مالقيتش الّي يواسيني ويطيّر علّيا وحشتهم

رجعت.. خاطر في غيابهم ذقت الويل

تخيّلتهم لرجوعي مستنّين

و الكفّ يدّي الّي طول عمرو محاذيهم متوحشين

لقيتهم تحت الغْبار باركين

ناكرين فيّا و منّي نافرين

لهمومي ماعاد سامعين

و على طول يديهم ليّا رامين

ندمت .. و قلت

يا بلومتي ما تلومش عليّا

موش من عوادي  نخون الّي يحس بيّا

نغدر الّي كانلي صدر حنين كيف لعباد ما حسّوش بالّي صاير فيّا

بعد مارجعتلك نتوسّلك تحضنّي و ماتسيّبنيش

على سبب فراقك ما تسألنيش

بالهموم الّي شاغلة بالي ماتفكّرنيش

ماتفكّرنيش بحال بلادي و الظّروف الّي أنا و غيري فيها نعيش

قتل و مقتول .. ناس ملهوفة عل الفلوس و ناس عل الكراسي هابطين ريش

لا همّتهم مصلحة البلاد

خلّاو الغني يزيد غْنى

و الزّوالي في الفقر يعيش

اييييييه , ريت يا بلومتي الفلوس اش تعمل ؟

الفلوس ترد  العبد سلطان

ترد الّي ما يعرفش البحر و قْوانينو قبطان

والّي كان ملايكة بالفلوس يا بلومتي يولّي شيطان

خلّيني ساكتة و مانزيدش نحكي

مكتوبي نعيش في بلاد تعيّشني عيشة الذّليل

ميسالش خلّيني على بلادي نتحسّر و نبكي

بالكشي يجي نهار و تضوا الدّنيا و يجفّ الدّمع الّي مالي العين

بالكشي الخير فينا يستنّا

و جاي الّي مايخلّيش قلبي يْنينْ

بالكشي على قريب يتحقّق الّي فيه نتمنّا

و هكّا نعيش أنا و غيري فرحانين

أنا يا ليّام الزّينة فيك نستنّا

وقتاش تجي و تخلّيني على بلادي نتهنّا

الشّوك يموت و ينبت الورد و ترجع أرض بلادي جنّة

تشرق الشّمس و يرجع النّور و تروح دحسة الظّلمة

ترجع البسمة عل الوجوه و تتنحّى هل الغمّة

نرجعوا يد وحدة , ولا نخلّيو أحزاب ولا غيرها تحرمنا من اللّمة

الزوّالي يلقى باش ياكل و يعيّش أولادو

وكل طْفل صْغير يفخر و يزيد يحب بلادو

أنا يا بلومتي نحب بلادي و الخير ليها نتمنّا

قلّي وقتاش تجي ؟

ملّيت و أنا في ليّام الزّينة نستنّا
...

سيرين رحومة