"معرفة النّاس كنوز" ..هكّا قالوا ناس بكري ...أمّا أناهم ناس؟ ...الناس بيدهم اجناس ..فيهم نفوس من ذهب ..و نفوس من فضة ..ونفوس من نحاس ..لكن اللي يحيّر أكثر  ..كيفاش معرفة الناس كنوز وقت اللّي ما يجيك منهم كان الهمّ و الغمّ ..و الحسد و الظلم ,

ناس اليوم بأغلبها تشوف فيك وجه المصلحة ...حاجة من حوايجها وقت اللّي تستحقّك تولّي عنتر زمانك و كيف توفى قضيتهم يطيّشوك على طول يدّهم ..ناس اليوم في وجهك يضحكولك , يبشبشوا بيك وقت اللّي دوب ما تعطي باللّفتة تولّي كاراكوز بيك و عليك ..كيفك كيف غيرك ...غيرك اللّي كان مقلقهم و يحكيولك بيه ..

اتقلبت الادوار و ولاّ هو في بلاصتك انتي و انتي في بلاصتو هوّ ..حوّس تفهم ...في حضرتك يسلطنوك وباللّفتة يقرّدوك ...يسلطنوك صحيح اما في حقيقة الامر يتسلطنوا عليك ..يحكموا فيك تحت حسّ مسّ ومن غير ما تفيق ..بضربان" اللّوغة " (اللّغة) مش بضربان الخفيف .."فريمان"  شيّ يعمل الكيف .كيف تجي تشوف من جهة .. بـأنا حق يتسلطنوا عليك في حين ما فما كان سلطان واحد هو خالقنا هو وحدو اللّي ليه الحق انو يحكم فينا , يحكم علينا و يحاسبنا .. في حين حدّ ما عندو هالحقّ و لا يحقّلهم حقّ بش يحكم علينا و لا يحكي بينا... ''سارتر'' هو بيدو'' قال ''الاخر جحيم...على خاطرو يحدّلك من حريتك و عفويتك ...يتدخل في الشّقيقة و الرقيقة..

يخوّفك و يحشمك و يخليكش على راحتك ؛ما يخليكش تكون انتي كيما انتي خاطرو يفرض عليك بطريقة او باخرى انك تبدّل في روحك.. مظهرك او رأيك.. يحكم عليك  انك تولي كيفو بش

تنجم تكون فرد من المجموعة "سينون"حنك الباب مكش منا اقعد منبوذ محقور في التركينة... شفتوه علاش قال عليه جحيم... اما ما ننساوش شطر القولة "لا بد منه " اييه قالك جحيم لا بد منه ... صحيح ..برغم الخايب اللي فيه لا بد منه يكون معانا و في حياتنا على خاطر يقولو اللي هو مرايتنا و احنا مرايته فبحيث كيف يحكي بينا اوعلينا ماله الا يحكي على روحه و يشوف في روحه في حاجات استفزته استفزت الهواجس اللي ساكنته او في حاجات مزينتنا و ناقصته فيطلّع فيك العيوب السّبعة حتى يطفّي النّار اللي لاهبة فيه من جهة و من جهة اخرى بش

يساتسفي روحو. و يحس بالتوازن فتولي الحكاية متع الحكم و المحاسبة مالها الا "ميكانيزم دو ديفونس"

هذا اذا فسرنا الهدرة من منطلق نظريات علم النفس ...الحق هكّا الحكاية تولي معقولة و نعذروه ...اماانتي وين من هالتحليل و التفسير ...يموتك و يحييك و انتي ملسقها في التحليل النفسي ...اييي و مبعد كيفاش تتعامل معاه معناها تحبه وتكرهه لا نحبك لا نصبر عليك و الا تهرب منه نهار وتهرب ليه مالغدوة خاطرو يحمي في روحه ...اييي و انتي وين في هالدّوامة ...لو كان بش تعمل روحك مغناني مطفي الضو مالها الا حيلة غير ناجعة على خاطر الشيّ بش يولّي دخلاني يغلّي غليان بارد مالبرّة و مالدّاخل بركان ما يخمد الاّ ما تحكي و تشكي و هوّ فما شكون مازال يخلّيك تحكي.. شكون سمعك...  حكيت يا ويح و سكت بغصتك يا ويحين ...حكيت ما عجبهم... سلاطين هوما  ياخي نسيت... يحلّلو و يحرّموا حقّ التّعبير واحدهم... كان عجبهم حديثك ربّحوك و كان لا ... يخسّروك...تي بطبيعتهم  خسروني  ...خسروني اما ربّحوني معرفتي بنفسي.. بيهم و منهم نجّمت نعرف روحي ..نصنّفها ونعرّفها ..

لكن في نفس الوقت حدّولي وجودي على خاطر تواصلي معاهم جنة و نار ...بيهم نعيش و بلا بيهم نعيش حايرة ...الحكاية الكلها تحيّر ..حيرة في حيرة... حيرتي حبّيت نشاركها مع اللي يحسّ و يفهم ...يفهم ليعة تكوي مالدّاخل و تجّمدك مالبرّة و تموّتك في النهار ١٠٠ مرة لا تنجم تطفيها و لا تخمدها ..الخالق سبحانو وحدو عالم بيها ...اييي معرفتهم كنوز للّي يعرف يستكشف في داخله اما اش الفايدة من كنوز مبلّجة محبوسة في داخلك محبوسة في هاك الدّاموس اللي فيك اللّي ما توصلو الا ما تأمن بروحك و تسمع روحك  اييي و الناس عليك عينيهم حرّاس ما يخلوك في حالك كيفاه بش تسمع روحك و هوما ليل نهار معاك حاضرين ولا مش حاضرين معاك في فكرك في مخك في خيالك في مكنونك معاك ...عاد هالدّاموس حيطه وظلمته الناس و هوما بيدهم المفتاح يحلّولك بالوقت و يسكّرو عليك بالوقت مربوط بيهم طول حياتك سبب وجيعتك هوما  اما بلا بيهم ما تنجمش تعيش  ..."الدار حبس ..الشارع حبس حيطه العباد..انتي .." محبوس في كرة بلّار لا توصّل لا تخرّج حسّ ..تقعد... خايف.. خايف لا يموت حسّك لا يموت فنّك لا تموت وانتي حيّ ... و نمشي في طريق مستوي و المستوي حتى لفين" اْييي حتى لفين ؟" ... يعطيها الصحة اختنا امال المثلوثي الفنانة .. ابدعت في الوصف في غنايتها "خايف" غنايتها خديت منها هالمقطعين حبّيت نبرهن بيهم علّي كنت نقول فيه

.
طوّلت عليكم سامحوني و بالله تعذروني ...باللي حكيت و باقي اللّيعة ما تنجّم تتوصف و لا تتحكى على قاعدة صحيحة يمكن فيكم اللي حسّها و حاسسها و عاشها و الا يعيش فيها فيكم الي مخبّيها و مسكّتها ولا مطفّيها اما انا اليوم حبّيت نحكي عليها فمّاش النار تطفاشي؛  اييييه ...زعمة النار تطفاشي و نبرا من وجعاتي?!

معرفتهم كنوز صحيح  ..."و  كيما يرجع الفرتتّو للنّار اللي تحرقو نرجعلك "يا الاخر" حاير و مهنّي.. انتي و قلبي اقوى مني "... زايد مع الفنّ ..وحدو يعبّر.