نحبك وماتهزك ريح .. ووحدك مع الأرياح فين تمشي تميح ووحدي نصيح .. نرشمك في قلبي جبل راسي ..تاج فوق الراس هذا راسي ليك البوسة والمحواس بين ضلوعي والاحساس ..

مهما صار ليك الروح و الأنفاس والوسواس بيناتنا ينداس كي النمالة الضايعة الرحالة .. نحبك ومانطيق البعد لحظة .. البعد نار تكوي فجاشي .. تلهلب النبضات في صدري وعلى لحواشي يسيح رماد غامق كيف الليل و تسأل النجمات جاشي؟ نقلها والدمعة تتسرسب على الخدين لا ماجاشي..

نحبك ومهما قالو الناس وادردر العلقم بزهر الكاس و ليام مهما ضيعت الباس نبقى معاك والدقة باقي قوية.. الشدة على الباء تدوي عصية على الكسرة و على القهرة و على الواشين باسم الدين والتحريم للقلوب الحية..

مشدود بيا .. مشدود كي الاوتار فوق العود على شفتي موعود و على جبهتي مرسوم كي العنقود ضم يديك لراحتي تتغير الألحان و الالوان على أجسادنا تسرح كي حلمنا المنشود

نحبك بالنايحة و الحانية و الباهية و الرب

بحروف قلة نحب

و بحروف كثرة نكتب على الحب

و بحروف كيف الما تقطر من عيونك نهبل مع جنونك و نصنع حكايات بيني وبينك و انت تضيع في خطوط كفي ادور في عينيا .. تبقى معايا والدقة باقي قوية ..

والشدة على الباء تدوي عصية على الكسرة و على القهرة و على الواشين باسم الدين والتحريم للقلوب الحية