دموعي نشفوا و انا بين يديه ناكل  في الضرب و الدم من راسي مازال مرشوم عالحيط،

شعر داخل بعضو ، حمير مبلبز ، كحل سايل ودمعة عالخد سايلة .

نهار جديد بدا وأنا كل يوم على نفس لحالة، نتذكرها أول مرة ، أول مرة كانت سكاكن تنخر فيا ،سب وعياط ،ضرب وعفن ...لحم أزرق ودم سايل ،أما ثانية ،ثالثة والعاشرة كانوا مش كيفها ،كانوا بالكيف .

تتذكرها أول مرة !!صباح مغيم مع صوت فيروز جاء من راديو شريناه مع بعضنا من سوق لنتيكة مع مطعم القهوة لي عمتهالي بديك ناقصة سكر ،عشيتها تحت البطانية تقرالي في كتاب بصوت عرفت شمعناها حنية .تذكروا اكا نهار ! محلاه ،مشبو ،معزو معفنو قادشو يوجع .نهارتها روحت الفرحة ملخد للخد مرسومة ،، أما ذيوبة الليل لشنوة مجعولين ..

تتذكر..

نهارتها روحت لأمي فرحانة بش نقلها زغرط يامي بنتك كبرت ، نجحت وولات علاها لكلام ، أما روحت وردة شايحة،قلب لايث،ترشيقة ودم بين الساقين سايل..بدن تقطع ، تهمش ، تمرمد ، لحم أزرق مع تراس بوسة مرصوصة ،مغفصة و معفنة..أمي تبكي ،تصيح بنتي واللات رهينة في تركينة ،نسا لحومة سبوني ، عايروني في ماكش صبية شكون بش يرضى بيك ، و الكلام المرزي، الماسط ، اللاسط، الجارح مازال  يزن، بابامرض ، خويا!! خويا قتلني ، غفصني، بالضرب، بالسب والعياط ذبحني.،الفم مطرشق من صياح السكات والعيون زراقو من الدموع لمدرڨة المخفية..  .تي حتى من أختي ، أختي قتلي كلو منك شكون بش يرضى يعرس بوحدة كيفي وحدة أختها .. أختها الذيوبة ذبحوها ومجتمع كمل ومخلاها.. ونتي ،إنتي يلي عاقدة فيك النوارة ، انتي يلي نبات ليل نهتري بيك رميتني ،عفستني ،شمت فيا ليسوا وميسواش.

خرجت أما مرة هذي مش بدن أزرق وبلا دموع على خديا ،مرة هذي خرجت بضحكة مرسومةوروبة عودت استويت ، مرة هذي من غير وجيعة ومن غير ضرب ،من غير  سب وعياط ، مرة هذي مانيش مظلومة ، مانيش مغصوبة ، مانيش مغلوبة ،مرة هاذي أنا لي حبيت والقلب لي في وسطي رميت .مرة هاذي مش كيما أول مرة !!

مرة هذي انا لي حبيت ..!!