بد عليه ، تجيك صعيبة مالاول ،  تعدي نهار كامل مخك سارح ؛ تسمع ضحكتو ، تشم  ريحتو كالمهبولة في كل بلاصة كنتو تمشيولها مبعضكم ، كل مرة تسمع تنوقيزة تليفونك ، آه هذا لازم هوا ؛ طلب يحب يسمع صوتك ؛ طلب باش يقلك الي على قد ما حاول ينساك ما نجمش ؛

طلب بش يحكيلك الي نهارو تعدى من غيرك ؛ طلب بش يقلك الي هذا آخر نهار بش يتعدى من غيرك ؛ تسيب الي في يدك الكل و تجري تتفقد تاليفونك و وقتها تلقى الي انتي تتخيل ، التليفون هملتو كيفك ، زوز ميساجات من عند صاحبتك تسأل على مصلحتها اييه وينو الي كان يطلبك كل درج بش تبقى سوايع تحكيلو على تفاصيل نهارك كيفاش تعدى و هو مركز بالرغم الي يعرف انو الي تحكي فيه كلو ما عندو حتى قيمة ، تقلو الي قطوستك اليوم ما حبتش تاكل ، الي انتي اليوم شريت صباط جديد ؛ تقلو الي انتي اليوم طيبت الفطور و حدك و نجحت و تلقاه هو مركز علاش ؟

خاطر يحب يسمع صوتك بعديكا يقص عليك بش يقلك نحبك و انتي وقتها يمشي تثرثيرك الكل و تموت بالحشمة و تسكت على خاطر بعد السنين الي عديتها معاه مزلت تحشم بش تقولهالو ،

و تتعدا الاياما ت و تبدا تتعود ..

توا وليت تنجم تقوم الصباح من غير ما تتفقد تاليفونك و تستنا ميساجو بش يصبح عليك ، توا وليت تنجم تفطر من غير ما تقلو نفطر و نرجعلك و يقلك هو يزي لا تولي بطبوطة راني ما نحبش في عرسي نمشي مع دبة ، توا وليت تنجم تلبس حوايجك من غير ما هو يختار معاك ، وليت تخرج من غير ما تبقى كل دقيقتين تبعثلو تصاورك و تقلو فاش تعمل

و بعد ..

تعرف واحد صدفة،  مالاول يمشي في بالك الي انتي مستحيل تنجم تكمل حياتك من غير ما تتذكر حبك القديم ، تختار تبعد بش ما تضلموش معاك اما هو يصبر و يوريلك العكس ؛ تبدى الدنيا تضحكلك و تزهالك الايام ، تولي حاجة indispensable في حياتك و تقول هذا هو ، صحيح كل كلمة يقولهالك تذكرك في حاجة ؛ كل ضحكة يضحكها ، كل شئ اما انتي تظهر الي انتي اقوى من كل حاجة تنجم تذكرك فيه و تحاول تتذكر كل حاجة خايبة في الاخر بش تنساه بالرغم الي ما تلقاش تولي تصطنعهم كلو في سبيل حبك الجديد و ترجع الضحكة لوجهك و تزهالك في النوار و تبدا تبني حياتك الجديدة،  و في لحظة ..

يسيبك .. يطيشك .. يبعثك

ذات