محلاني في عينيك
Arij Kaabachi - أريج كعباشيمحلاني في عينيك
ياللي جنتي و عذابي بين يديك
و انا لي ستحليت عذابك
و كرهت الجنة بلا بيك
و خرجت منها عريانة
و انت لي حبك كان ستري و غطايا
و ياريت يا ريتني ورقة من كتابك
حروفي ترسمها لمساتك
و صوت كلماتي تغطي سكاتك
شعليك..
محلاني في عينيك
و قت الحبسة و كبسة و الغصرة
و قت العين الحمرة و الجمرة اللي في قلبي تهيجها عينيك
اما انت وينك ... وقتلي صوتي بح و انا ناديك مادة يدي و ندعي فماش ما ربي يجيبك
ليا و يرميك في بلادك اللي زناقيها و تراكنها كل فوق صدري و بين ايدايا... و انا تمنيت اللي انا بين يديك
و ينك كيف القلب تجرح و على حيوط الذاكرة تلطخ لين مالضرب سكت و معاش تسمعو حسو
رتحت ؟ كيف دقاتو في الليل معاش تناديلك؟ و من نومك تسرقك و بعد الرب تشكيلك ؟
شهمك فيه هالقلب كيفو كيف اللحمة الخامرة الخامجة لاتشهي كلاب ولا قطعية
و يا شماتة اللي نطروك من قدام عينايا
و خلاوني بلا هواك ...
وانا اللي منتنفس كان هواك
و خليتني كيف الحمامة المكتفة المشنوقة
سارحة بهواك
و انا للحمي زراق و طاب و تهارا و ريشي لمزين هزو ريح هواك
انا اللي عديت في حبك ربطية بعد ربطية و حفات الساق و فرغت الاجياب
و وقتلي تمدت اليادين عنقتك و ملكت الدنيا بتذيبة عينيك
و محلاني في عينيك
و محلاني في مرايتي للي ما تزينت قدامها كان ليك
نسيت ... ؟
كيف البارح بكيتني و قدام مرايتي مسحت الكحل المغدر و لعنتك و انا نتغزل بيك
شعليك...
محلاني في عينيك
في قربكب نعشق عينيك
و في بعدك نضيع بلا بيك
و محلاهم هالعيون
كيف شرارة و النور
بسحرهم نشعل كانون و عجعاجي و جاوي
نبتيلك مقام و نزورك و نتبارك بجنوني بيك و دموعي
محلاهم هالعيون
كيف كلامهم يصير فوق القانون
يكشف البدن العريان المستور
و كيف يبيع هويا ليك باغلى سوم
و محلاني في عينيك
و مخيبني في عيون اللي كرهوك
اللي غارو منك و لاموك
كيف انت تضحك و انا نموت في سرك و بحرك الغارق و صحاريك
و محلاني في عينك
أريج كعباشي
Website Design Brisbane