محبة شطر لفة ..

لا نحبك لا نصبر عليك و لا تهمني وجيعتك و لا العرق المكفن في كفوف يديك..

لا تهمني دمعتك و لا ضحكتك الموردة على خديك ..

محبتي ليك محبة ماعرفهاش الزمان و لا صادفها حتى عاشق ولهان ،

نحبك كي تجيتي حاطة الحطة،

عينيك فيا مرشوقة باش تاكل من بدني قطعة و ريحتك تزيد على ما بيا و الرعشة تدب فيا،

نحب ناكلك كيما انت ..

نبلعك من غير مضغان ..

و الا .. خليني نمضغك..

نعشق صوت وجيعتك كي في وذنيا يرن،

يحسسني الي انا راجل و عليا الكلام ، نملك السلطة و الجاه ،

نحبك كي تقلي حاضر و ماتناقشني و كلمة ماتزيدني..

نحبك كي تتوحشني و ترجعلي وحدك وحدك تكلمني و مني تطلب السماح حتى و انا غالط و عليك نتعزز لين دموعك تهبط و انا نترشفهم قطرة قطرة و زيد في وجيعتك نتبنن و نتفنن ..

نحبك كي تقلي انا الكل في الكل و حياتك بلا بيا ماتكمل ،..

نحبك خاطر ماعندكش شخصية و خوفك مني ريحتو تعرضني من راس النهج و شطر الثنية ..

الحب عندي كره و الكره عندي محبة ..

حبي ليك شطر لفة و كرهي ليك لفة ملفوفة في كفن روحك لي كانت عليا ملهوفة .