بعد السماء على الأرض انتي بعيد

وآنا نعشق في سماك

كيف العصفور بلاش جوانح

ينقز يحب يطير

آنا نحب نتنفس هواك

نعد معاك نجومك

نتدفى بشمسك

نترعد من رعدك

رعدك إلي يسكت الكلام وينطق السكوت

كلامك المرتوب ساعات إلي يحيي إلي مات،يرجع إلي تعدى وفات

وإلي ساعات يبدا مخلوض لا تفرز منو لا الحروف ولا الكلمات،يقتل إلي عمرو ما جرب بالعرق بالعرق مات

ما نحبكش،نحسك

ما نحبش نحبك،نحب نبقى ديما نحسك

إنتي عكس الحاجات ومرايتها

إنتي صوت الحاجات وتصويرتها

إنتي تصورت إلي خبيتها في صندوق الذكريات

تصويرتي إلي نلوج عليها فيهم ،في الأنهجة والزناقي، في الأخبار والحكايات

ما نعرف منك كان تصويرتي

ومانحبش نعرفك،نحب نبقى ديما نحسك

إنتي..

إنتي الحلمة إلي مانحبكش تفيقني منها

وإنتي الكابوس إلي عمري ما نخاف منو

إنتي الطيحة بتكربيسة

وإنتي الترهويجة

إنتي البعيد القريب

ومنحبكش تخليني نقربلك،نحبك تخليني ديما نحسك

إنتي...

إنتي إلي ديما نحكي عليه من غير ما نحكي عليك

إنتي إلي ديما نحكيلهم عليه من غير ما نسميك

ما نحبش نسميك،على قد ما نحب نسمي إلي نحس بيه وقتلي نحسك

نستنى فيك ومانحبكش تجي

منحبش تجي العين في العين،عينيا باش تفضحني قدامك

ما نحبش نتربث و نقلب قهوتي ووجهي يحمار ونبلع لساني

ما نحبكش تعرفني،ما نحبكش تفضحني

ما نحبكش تسكتني،خاطر نحب كلامي كيف نكتب ونحسك أكثر ملي نحبك

ما نحبكش

ما نحب فيك كان حب درويش لأرضو وبلادو

قباحة بن بريك في أتعس أوصت

عشقة شكري لتراكن حومتو،لعائلتو،الرفاق،لحلمتو بتونس،لبناتو...

بهامة أكثر حد بهيم قابلتو في حياتي

تي بالضبط كيف نراك ونهرب نجري

كيف تسلم وبالسيف نمدلك يدي

كيف تسأل ونجاوبك بتعبير درى كيفاش بوجهي

ريتها البهامة هذي الكل نحبها فيك في عز هبلاتك

نحبو أذاكا شعرك الهايج

ونفد كيف جي إنسنس عليك بالسرقة ونلقاك حجمت

نحب دولارك إلي نهار طالع وألف هابط

نحبك كيف تولي ساقط

نحب هاذم الكل فيك،وخلاف هذا عمرك ما تخمم إلي آنا نحبك

مانحبكش و ما صاب كان جيت منحبش الدنيا كيفك

ما صاب كان جيت نعرف نبنيها دنيتنا كيما هيا في مخي قدامك،كيما نعرف ناقفلك على الكلمة ونطيرلك كيفك

ماصاب كان جيت كيما السيقارو نشعلك كيف نتوحشك نشم ريحتك،ووقتلي تخنقني نطفيك،ما نخليك تحصرني و قبل ماتهرب بيا نرميك بعيد

مانحبكش عمري ما كتبتها ليك

مانحبكش هيا حكاية مدفونة تحيرت وكبرت بيك

مانحبكش هربة منهم الكل ليا فيك

مالحزن والفرحة

من الأبيض والأكحل

مالضحكة والدمعة

هيا طريقتنا إلي باش نشقوه على ضو شمعة

ووقتلي تطفى تكفي من عينيك هاك اللمعة

تكفي تبسيمة بش نرضى

تكفي تعنيقة بش ننسى

وماصاب كان يجي نهار نهار ونحكي ملي نخمم فيه وأنا نكتب حتى فكرة وحدة

ما صاب تصدق

وما صاب نصدق

قداش ما نحبكش

بقلم ريم شعباني