ماهوش حب سميه اللِّي تحب ..

سميه ترتيحة بعد تعب ولا توبة بعد سنين كْلَّبْ ..

ماهوش حب سميه اللِّي تحب ..

سميه رجعة آدم للجنة بعدما بليس فيه حكم ولا فرحة في ليل ظلام دحيس ..

ماهوش حب سميه اللِّي تحب ..

سميه شهوة ولا يمكن غلطة و نزوة ..

قول عجبتك البوسة و الحملة ..

قول عجبك دلالي و حبي ليك و هبالي و ماتقولش حب ..

و ماهوش حب سميه اللِّي تحب ..

سميه حب إمتلاك ، ولا حبيت تلعبها ملاك باش بعد غيابك مايقولوش ، جاء ذيب بالهف كلاك و خذا منك شيحب و شبابك خطف ..

أووف ... ماتقولش حب و ماكانش حب و ماهوش حب و سميه اللي تحب ..

خاطر الراجل كي يحب يهد لهدود و يتهد ، و يبني فالسماء حدود و قدام عشقوا يشق صدروا و من بين اللحود يرد الروح و يرفع راسوا و يقول .. لا قبلي لا بعدي فالحب

و حد الرب حدي

و ماهوش حب سميه اللِّي تحب ..

تراه قلي إنتي شعملت على خاطر حبك ؟..

هه لا جيت ، لا تعبت ، لا سهرت الليل ، و يديَّ طلبت ..

لا ضحيت ولا لنجوم الرب بكيت و لا عليا كتبت ولا حتى حكيت و تقول حبيت ؟؟

تي يزي فك من كذبك عييت و من كلامك الفارغ مليت ..

و ماهوش حب سميه اللِّي تحب ..

اي ماو قالوا الحب مات مع عنتر و عبلة ، قيس و ليلى ، روميو و جوليات و كبرنا مع كذبة الحب مات ، لين ولينا عايشين في زمان أغلب قصص الحب ماتوفى نهايتها سعيدة كان فالروايات و

الافلام ..

و ماهوش حب سميه اللِّي تحب

أما حبي ليك فات لخيال ، لا يتقاس بأميال و لا يتلخص لا في حكاية لا في كتاب..

كيف حب العاقر لي بعد سنين يرزقها الرب بغشير صغير ..

كيف الضرير لي يحلم بنعمة البصر ..

و كيف الخوطيفة لي تهرب من قطرة المطر

كيف قلبي لي يتجمَّرْ و نراك معاهم الكل و اني وحدي بلا بيك

..

كيف ترجع الشتوية و تعنق لمطر و ترش مَٱيّتها عالليعة عالجمره عالحرّ ..

و كيف روحك لي تفرفت في خيالي مشتاقة لدلالي ..

و كلو كان في خيالي و عايشة بوجيعتك و بغيرها مانرضا و مايحلالي ..

و كي جيت لدنيتي شعملت في حبك لي عايشة بيه ليا سنين ؟..

شعملت في حبك و دموعي و صبري و سهر الليالي ؟

وسختهم ، هنتلتهم، مرمتهم ،  هلكتهم ، و فسدتهم بنزاسة عقلك الذي لا يبالي ..

و اللِّي بنيتو و رضيت بيه في خيالي الكل هديتوا .. و معاد شي يتصلح ولا يتعاش ..

و العيب مش فيك ، لا لعيب فيا اني اللِّي صابرة على جد والديك و نقول تو يجي نهار و يفهمني و يحس ..

تي ولا ماهوش حب بجاه الرب سميه اللِّي تحب و ماتقولش حب ..

و مدام الحب في كتابك طلع هكا ، خلينا نعيشوا تتحت قاعدة "الحب مش لازم يكون مبني على علاقة بين ثنين "..

يكفي إنك ترسم لي تحب كيما تحب في خيالك و بيه تعيش ارحم من إنك تعدي ليالي قلبك شاقي و ينين على حب يضيع في رمشة عين على خاطر واحد باش يكمل معاك حياتوا

مايضحيش يشك فيك و يوعد و بالوعود مايوفيش..

و ماهوش حب سميه اللِّي تحب ..