ليوم اكتشفت الي انا مانيش قوية اما ممثلة باهية... تحية للبنات الي كيفي يعرفو يضحكو قدام الناس فالنهار و في الليل ما تفهمهم و تونسهم كان مخدتهم هي الي تبكي عليها حتى يهزك النوم و تمسحلك دموعك الغالية

... حقا... لمرا الي فاتت ريت تصويرة عالفايسبوك من جماعة نبارة يتمنيكو على دمعة الطفلة قداش غالية لدرجة انو كل دمعة عبارة ديامنطة و لذا باش الراجل يستغنى لازم يبكيها الطفلة... دموعها غالية و اغلى منك زادة... رجال اخر زمان...

انا مانيش ضد الطفلة كي تبكي بالعكس هاذيكا اكثر حاجة تفرهد اما للاسف برشا يشوفوها ضعف كان موش تزعبين و دلال... يا بابا الدموع هاذيكا كان ما تهبطش ما نجمش تعرف عليها حواء اش تنجم تعمل فلذا الحمد لله على هالنعمة...


تحية للبنات الي يحسوا رواحهم قويين و هوما ناقصين حنان ناقصين كلمة حلوة تخرج مالقلب موش ناقصين الكلمات لي يسمعو فيها كل يوم و الي ما جات شي هاو قطوستي هاو يا عسلة هاو يا حلوة و الي ظاهرين موش متاع تبزنيس حتى طرف من غير ما نحكيو عالكلام الزايد باش يوصلك الي انتي تحفونة تهبل اما راني حاجتي بيك ليلة و لا ساعة و بالسلامة فيلامان...


حكيت شوية على نفس الموضوع اما نسيت ا حكيتش على الرجال الي تحلك فالجنة ذراع و يتلها بيك و وين نحطك يا طبق الورد و يخليك تسخايلو يحبك فالاخر يجبد روحو فرد مرة و كان زهرت معاك يهز عليك و يقلك غاطس فالمشاكل و لا يقلك الجملة الشهيرة : انتي تبارك لله عليك مزيانة ضحاكة و طبيعتك تفتق اما راني انا مانيش نورمال و راك تستحق ما خير مني...


اييييييييييييييييييييه....بالطبيعة نستحق ما خير منك... تقولها بكل ثيقتك و انت مالداخل شادة روحك على كل نوع مالهبال و لا مالضعف اما ما حاجتكش باش تحسو الي بلاش بيه الدنيا توفى...تروح للدار و تشد كالمخدة و تبكي حتى ترقد المفيد من غدوة تقوم خير...تحب تقوم تحس روحك خير... تحل الراديون ويبداو غنايات الحزن الكل تسكر و تحل الارديناتور تعرضك تصويرتكم تسكر و تخرج بزهرك ما تلقا كان الكوبلوات يحوسو و هابط عليهم الحب... تروح تجري للمخدة... و نهارت الي تصيرلك الحكايات هاذومة و تضحك على روحك اعرف الي انت طفلة قوية...