فما عباد ماشي في بالهم التوانسة الي يعيشو في الخارج خرجو من تونس خاطر ما يحبوهاش و كيف يشوفوهم يتوحشوها في كتيبتهم و تصاورهم و كلامهم يقولو ملا كذب و الخ من هاك اللغة... حبيت نصلحلكم حاجة...

التوانسة الي خرجو من تونس ينجمو يكونو يحبوها أكثر مإلي ساكنين فيها راهو ... خاطر فيها العايلة و الاعزاز عليهم و البلايص الي كي يتوحشوها ما ينجموش يمشيو يشوفوها و العباد الي عاشروها و لعبو معاها في الصغر و إلي شهر صلاعة ما يشبعهمش بيهم و فيها الفل و الياسمين إلي موش موجود كان في تونس و بخور الاعراس و هاك اللمة و هاك التزغريط الي يسمع من راس الزنقة و علوش العيد و حلو العيد الصغير و ريحة رمضان البنينة و صوت المدفع و صوت الاذان و القرآن الي خارج من صمعة الجامع و صوت البراحة في الاسواق و ملوخيتنا و الخبز طابونة و الكسكسي باللحم و الدلاعة الي تتبرج في البحر و كانون و براد الجدة و ريحة قهوة الجد و الحمام و القهاوي متاعنا و الرامي و الشكبة و ضحكة التوانسة الي مالقلب..... و بارشا

حاجات اخرى... و كونو متأكدين إلي الحاجات هاذم و غيرها في بال و قلب كل تونسي مهاجر أكثر من تونسي عايش فيها و فادد منها... أحنا الخبزة و المكتوب خلاونا نبعدو عليها و ينجم يكون القهر الي كان كاتم على نفوس البعض كيف كان الديكتاتور فيها ... لكن راهو كيف يقول نحب تونس موش يكذب خاطرو خارج من أغرق بير في جواجيه هالاحساس...

و كيف يقول توحشت تونس راهو ما تملالو حتى بلاد أخرى بلاصتها في قلبو.... يكفي إنها حاميتو بكلمة وطن و فيها ساكنين الغالين عليه و الي دمهم من دمو ... صحيح فيها الخايب كيما الباهي كيف أي بلاد لكن بلاصتها ما تتبدلش و حتى كان فما تنقريصة راهو موش منها مالناس الخايبين إلي فيها... براف ربي يحفظ تونس و يحميها و يحمي كل تونسي يعيش فيها و البرة منها تجمع بيناتهم كلمة "بارشا" ♡