حكايتنا عمرها ما كانت خيالية حكايتنا صحيحة اما عمرها ما كانت عقلية تفهم شهوتي من عينيا كي نطلب تجيبلي السما بين يديا باسم الصدفة دخلت حياتي و سكنت فيا من غير ما نشكي حزني و همي تشوفو فيا بعد نص الليل تبدا قصتنا غزرتنا ضحكتنا حت مالقمرة تغير من لمتنا ,

في هااليلة اللي قمرتها كاملة و نجومها فالسما هاملة , في كلامك حاجة رهوجتني في صوتك نبرة مهمشتني كالمهبولة خلتني , علا بلاصة في قلبك لهفتني , حكاياتك بالظبط كيما موزيكتي فالدنيا زادت عشقتني كيما شكلاطتي من بنتها نهدتني,

ما تخيلتش يجي نهار و نحل قلبي و نشوف الدنيا فيك و في ربي , نعيش قصة غرام حكاية احلا و ازين مل الافلام هاذي الكل كانت احلام و اوهام ما تخيلتش يجي نهار و في حياتي الشمس تشرق و يتحرك اكا القلب المتروك انت حاجة فوق المنطوق تربعت عالقلب و مشيت فالعروق و في هاك اليلة الي قمرتها كاملة حبك هو الدين الوحيد لي امنت بيه بخلاف ديني ,

اول مرة مخي يعكش و قلبي هو فالثنيا يوريني في ها اليوم في عشقة تسولتك في حبك تورطت في روحك توحدت في بدنك تقمصت , و قتلك خلي نحبك ما تمشيش خلي نعشقك ما تخلينيش .. نخاف تجي نوارة كيفي تبدا مسرارة اما الفرق بيناتنا هي مزهارة تغرق في غزرتك, تمهمشها ضحكتك, تذوب في لحيتك الخفيفة و تشدها بسموريتك العسلية , ليلتها خفت مالغير و قتلك ما تخلي بيا الموت اهون و خير , انت حببتني فيك عليك اللوم , سيبتلك روحي و قتلك ادخل بيا واد الحب و عوم , ركبني علا سرجك المطروز بالفضة و اجذبني بشعرك الحرير و رد بالك تخلي بيا الموت اهون و خير , الليلة بش نتمرد و من خوفي نتجرد نبعد علا كبرياي الي خانقني و نقلك انسا الدنيا و عنقني , مع القمرة نكملو ليلتنا لا نخمم في ثنية و لا مرواح , هي ليلة و فراقها صباح ..