كيف النسمة تهرب بهواها على وجهك و ترمي نداها على خدّيك

نغير عليك

كيف المطرة تتغلغل في روحك نبكي و نتخيّل دمعاتي مطر يسيح على شفراتك

و يغسل بالريحة خطواتك و تفنى فيّا و نفنى فيك

نغير عليك

كيف الأم الي حملتك تسعة شهور و رضعتك حلمة و بسمة و حكايات

نحب نولّي بيدي أمك و حليبي من سدري لفمّك نكبر بيك و تكبر بيّا

و تتهنّى قدّام عينيّا سنين طويلة كلّي فات

ترمي راسك على حجري و تبكي نساوين خانوك و نقعد وحدي ندندن صغري نواسي فيك هوما خسروك

و كيف تحكيلي علّي تحب و الّي نسات جروحها فيك نغير عليك

كيف سحابة تمدّ اللون على خيالك و انت متعدّي .. نسرح في فنّك ليالي و النوم بحبّك يهون .. نولّي في لحظة جالاتيا و تولّي انت بجماليون وتعشقها في غفلة منّي و تمسّ الرقبة بيديك

نغير عليك

كيف الحرف يعيش ففمّك و يرقد و يقوم فأمان نتخيّلني ضمّة و فتحة و كسرة في لسان العربان

نعلّق الهمزة على كتفي و نعنّق حروف الجر و نجرّ بلساني وردة لقلبك نسقيها ببحر

فعروقك تتكتّل كلمة مليانة بحسّك و غناك .. محصورة فغصّة و بهواك تسيّبها على ورقة بيضة تشطح لين يموج الليل

لو تعرف قدّاش الغيرة تذهب شيرة العشّاقة ما كنت تخليني لحظة عليك ملهوفة و مشتاقة

و هلاوس تتلاقى براسي و تصرح بين ضلوعي زمان و في صدري تكبر الليعة تفتّح في شتاها بستان

لو تعرف قدّاش الدنيا تتكتّل علّي بجنونو هايم في الارض و جيعان .. متوحّش كلمة من غالي و لا همسة و لا توشويشة على لمسة

ما كنت تخلّيني نصلّي و نذكر في صلاتي عينيك و الكتّابة تكتب جنبي رسايل للمولى تشكيلو كفري بيه و عشقي ليك و التسليم يكون مبدّع .. شعري عاليمين مهدّع  و على يساري الشفّة

تتمتعّ بكلمة وحدة نغير عليك.