Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

لمرا ..

woman-shadow-mystery

Sonia - سنيا


لمرا .. لمرا بدن ، لحمه طريّه تقطّر سمن ، عينين شهل خضر مستكحلين زرق. كتغزرلك تتمنّى يكونولك كفن ، سآعات يولّيو حمر ، يلهموك يلبسوك بنارهم يحرقوك يفتفتوك يعذّبوك في شوافرهم يعلّقوك و في دمعتهم يسكّنوك يحبسوك .. و يقتلوك

 

لمرا خشم ، مخنفر محلاه ڨنّوشو واتاها مصراره ، طويل عريض ساعات خشم سحّاره و تقول عليها مكّاره كتهزّو تولّي للعشره نكّاره غدّاره و  كتمدّو نسناسه و غايره أما تشمّها و هيّ طايره و في شكّها ما تقعد حايره   أما ساعات تشدّها منّو روحها تطلع و في ذبحانك تطمع

 

هيّ فمّ ،  عريض ولا غليظ ، رقيق بليدْ أحمر دمّ ساعات يشكر ساعات يذمّ و ساعات على غيرو يترمى و كي يفدّ على روحو يتلمّ ، لسانو يغزل لحريرْ و كيتّطيقر يهبّطك في بير يهبّلك و بصوتو يخلّيك تغير و على صيراتو من غير حسّ تْسير ،  فمّ يتكلّم ، بلْسانو يسلّم و من غيرو يتعلّم و يعلّم  ، كيفكم ساعات يكذب و يفلّم ، فمّ يبوس ، يسبّ و في لمحبّه يغوص .

 

هيّ قلب ، حبّ و تحبّ و برشا مرّات سعدو تكبّ ، تسبّ و مالدّنيا تعب ، قلب منبوز يقولو عليه منزوز ، ملّحْمر للآكحل يتبدّل في شباك غيرو كلّ مرٌه يتخبّل ، على عقلها يتسبّل و يسيّب في دلالو و ساعات يمرج بهبالو ، قلب لبوه لا تتعدّى عليه مشكله لا تقلّقو كبوه ، يصبر و غيرو يصبّر ، لايهمو برد و لا الوحده يعبّر لآ على غيرو يكبّر و ينبّر ، قلب ابيض حليب ، أصفر ليمونه ولا اكحل زيتونه المهمٌ قلب يدقّ

 

هيّ شعر مغطّي معرّي مقصوص في تقْريطه مرْصوص ، تحت محرمه مغْصور في كعْكه معصور الرّاجل بيه مسحور ،مسيّب مهدّع عل راس مبدّع قصير مڨرْڨط ،طويل مڨرْبطْ ، محْلول علأكتاف مسبول شايح ولا مبلول ، أحمر يسحر لعْقول ،أكحل ليل ، أصفر يميلْ يسار و يمين .  شعرها تاج لراسها و زينتها ، ورثتّو لبنتها و خذات حلاوتو من عند أمّيمتها.

 

هيّ أكتاف هازّه عليهم حْمل ، لا تشقى لا تملّ ، لا تشكي لا غيرها بدموعها تبلّ ،  لا للذّل توطّيهم و لا على غيرها تعلّيهم، أكْتاف بالصّبر  سخان ، رغملّي بالهمّ رزان ، لمرا صدر حنين ، أنزاصه تفّاحه ولا ليم ، صدر لسبّ غيرو ماعبّر  ، صدر رضّع و كبّر ولاد ، عانى ملعينين و العباد ، صدر كان تغطّى ولّا ريق و كان تعرّى يولّي مولاه قبيح ، أما صدر عايش عمرو ما هزّو الرّيح و خيرو على غيرو عمرو ما يريحْ

 

هيّ يدين ، تشقّقت من خدمة سنين ، تعاون في لخرين ، تحمّل تخمّل ، اتطيّب ، تخيّط ، تصوّر ، في الدّولاب تدوّر ، تكتب و تزيّن ، تهزّ لحطب و تڨدّ الحلفه ، تسقي ، تزرع و تمدّ العلْفه ، تنحّي من فمّها و لولدها تعطي ، على خاترهم تشقى للّي تولّي تحبي ، هوما يهدّو و هيّ تبني ، هوما يكسّرو و بيديها تعلّي ، يديها تهرّاو مشاو و ساقيها حفاو أما كي بيديها بيهم تلهات ينجّمو نهار يتقلبو يولّيو سلاح خاترها مش ديما ناس ملاح ، تخنق ، تشنق ، تخبّش ، تنتّش ، تحفرلك قبرك و إتّطيّشك ، إتريّشك ، إتخيّشك و في جهنّم تعيّشك..

 

لمرا جلده ، ساعات تحْيا ساعات تولّي ميته ، عزوزه مايهمّها قرص ، جلده شايحه لاهي طريّه لا هي فاوحه حرشه لا همّها في كلام عرشهها ، ساعات تضحك ساعات تشهق ما تلحقق ، هيّ ساقين مغطّين بجلباب ولا ممدودين تحت روبه قصيره سكاكن في وجوه لعباد ، يموتو عل عناد ، يطقطقو يشقشقو بخلخال عيشه و الأرض مش حاسّتهم كاينهم ريشه ، السْماء عندهم تحريشه ، طموحهم أكبر من هكّه بالنّسبه ليهم هذي مش عيشه..

 

لمرا عقل يوزن جبال يعقّل بلدان يولّي في رقبة الرّجال حبال ، عقل ساعات القلب يعميه ، يكويه و يبكّيه ، ساعات لعقل يربح و يفرح و لمرا تولّي سيد صعبها يذوّب لحديد ، تقسم ظهر بيد ، تصول تجول ، مش ديمآ تلقى لقبول ، تعيّط ، تصيح ، تقوم كلّ ما تطيح ، على بقعتها تعارك ، تدرزّ و في الضّرب تحزّ ، للٱحترام غيرها تلزّ ، تدمّع و حيوط قلبها تشمّع ، ما تحتاجش باش تصويرتها تلمّع ،


هيّ مرا كيفها كرّاجل تتكيّف، تشرب ، تصلّي ، تعرّي ، تزكّي ، من عقلها تهجّ ، تحجّ ، في الشّيخه تعوم ، تصوم ، على غيرها ما تلوم ، توصّي بالخير و عل شرّ ما تهزّ ، تحبّ و غيرها تعزّ ، تكره و تغير ، تصوحب و تقصّ ، تتربّى و بعد ترجع بالمحبّه تغصّ ، تحكم و تسيّب الماء عل بطّيخ ، تكبس و ساعات ترخف و للّي تحبّو تطيح ، تظحك و في جواجيها تصيح .

 

لمرا ، هيّ الولّاده ، الوسّاده ،الفدلاكه ، الرّهدانه ، القرهمانه ، السّكبانه ، الحنّانه ، الفنّانه ، المزيانه، الخرنانه ، الزّعبانه ، الشّهلوله ، الحلّوفه ، اللّهلوبه ، البهلوله ، المهبوله ، البليده ، الرّكيكه ، الحنينه ، المسكينه ، العزوزه ، الشّابه ، الصّغرونه ، الفزغونه ، الفزدقه ، البندقه ، الحبقه ، الورده ، الياسمينه ، الزّعفرانه ، لحلوّه ، لعسله ، القبيحه ، الفصيحه ، الغالطه ، الصّحيحه ... حوّا و التّفاح ، و باب الجّنه في يدٌها هيّ لمفتاح و كي يتعب الرّاجل على صدرها يرتاح

 

سنيا


 

لمرا ..