لا سماح لا رباح

Sabrine Mejri - صابرين الماجري

لا سماح لا رباح ..

و كل ما نزيد نتفكر ننقم

نكره و الحقد اللي عمرو ما سكن قلبي يكبر

و نضيع .. بين كذبة و غدرة

بين الخيانة .. و الدوانة

و الكلام المعبي سفاهة

و خللي عاد قلة الحيا

كي الغلط ساكنك من راسك لساسك و انت تتملص ..

تخزر في عينين الناس و حكايات اخرى تألف

و لا سماح لا رباح ..

حتى كان ما يطلعش عليك صباح ..

و مفتاح روحك يبدى عندي .. في يدي ..

منسامحش اللي سرقلي حلمتي ..

حرمني من ضو في عينيا .. و ضحكة صافية كانت فيا ..

و ضعضعلي روحي .. خلاني بين هوا و فضا

بين كربي و همي .. و عمري الماشي مني ..

اللي رهوجني فمبادئي شككني .. و خلاني نكفر بالصدق ..

و مازلت نكفر ..

كل ما نشلق بالكذب مغلف السياسة ..

و تشنشينة الذاتي و الموضوعي البايتة ..

كل ما نفيق بضحكة صفرا بلباقة..

كل ما نشم ريحة الخيانة في زوز بيوت شعر كلاهم السوس..

و كل ما نسمع بحكايات كلاها الدود ..

كذب .. خيانة .. خيانة .. كذب ..

وين الزوبعة و الدوامة ..

و التيار اللي يقصف في عمر النوار ..

و براءة الصغار و الحلمة البيضا ..

و مازلت نكفر ..

كل ما نرى الفقر و الجوع ..

و نشم ريحة الخضوع ..

و نرى بوليس في الشارع ..

نتفكر اللي حببني فيك .. وين كنت تحكيلي على وجيعتك في بلادك و اماليك ..

و تحكيلي على البراهمي و بلعيد ..

و دمعتك على عينيك اللي قسمناها

و عشقاتنا في بلايصنا اللي ردمناها..

نكفر بكذبك فيهم ..

و خيانتك ليهم كي خنتني ..

و نترهوج و تضيع البوصلة المعدلة عليهم ..

اما حبي ليهم و ايماني بيهم قبلك يرجعني

نكفر بيك بكذبك

و نرجع نتعنكش بالصدق اللي فيهم ..

و نرجع نصيح

لا سماح لا رباح ..

اللي خان صدق و انسانة

ردوا بالكم تعطيوه أمانة ..

صابرين الماجري

Website Design Brisbane