الدنيا هذي كيما تعرفك على ناس تخلي فيك بصمة وتتعلم منها، كيما زادة تعطيك ناس تشوف فيهم روحك الثانية، ما تقولش نحبّ نعيش وحدي ما نغير ما نتكلم ولا نجاوب حدّ، ولا نعاشر ولا نعرف حدّ، خلي روحك جميلة وبصداقة ناس عيشها بروح جديدة،

مازال الخير في الدنيا ومازال شكون يقدر الكلمة ويعطيها قيمتها ومكانتها. ما تقولش ما عندي حدّ في الدنيا وما نجم نعمل على حدّ يزي هاني وحدي عايش، ممكن في بعض الامور تنجم أما في اوقات تحتاج لكلمة باهية اللي ما تجيك كان من قلوب صافية، ممكن تستحق ايد تقولك هاني معاك عمري ما نخليك، الايد هذي ممكن تكون من اخت من خو من صاحب ومن صديق وممكن زادة من انسان ما تعرفوش.

صحيح حاجة باهية كي نلقو شكون ديما معانا، نلقو الصديق اللي معاه ما تخافش من كلامك خاطرك تعرف مستحيل يفسر نيتك بحاجة اخرى، خاطر هو المعنى الحقيقي لكل كلمة صداقة

حتى كان صار بينكم سوء تفاهم والا غش يبقى القلب صافي وبالضحكة ترجع اللي فات.

الناس هذي تعاشر وتعرف معنى الاهتمام اما رد باك تطلب من حدّ باش يتلهى بيك، عمرك ما تقولو شبيك ما حكيتش وما كلمتنش، عمرك ما تقولو وينك وبكلمة ما تفكرتنيش
كون لروحك واقفلها وما تخليهاش محتاجة لمحبّة مش صادقة والا صحبة مش هادفة، خاطر عمرو ‫الاهتمام‬ ما يتطلب،

عاشر واعرف وعمرك ما تقول ندمت ديما خلي قلبك ابيض مهما حاولو يبدلوه وبمشاعرهم السلبية يحاربوه أما خليك محافظ على نيتك الطيبة مع كل انسان تعرفو خاطر ممكن يكون عند حسن ثقتك، ويكون صديقك، ولو خلوك نهار تخمم ان نيتك الطيبة هي اسوء صفة عندك حط في بالك حاجة وحدة ما تنساهاش انو ربي سبحانو يحب المحسنين وربي كريم ما يضيع فعل جميل.

مش كل يوم الدنيا تعطينا ناس تخلي حياتنا جميلة ، ناس تزهي ايامنا وتنسينا احزانا، الناس هذي اللي بكلمتها تداوي وبسمتها تعطينا امل جديد في الحياة، الناس هذي اللي تمشيلها بالدمعة وترجع منها بضحكة تملى القلب وتجدد الروح، وعلى خاطر الناس هذي مش كل يوم انجمو نلقاها والا بالساهل انجمو نجيباها، يلزم انت اللي عندك الناس هذي تعرف قيمتها في وجودها مش في غيابها، تقدر اللي تعملو على خاطرك الكل ومتحملة وديما معاك في الحلو والمر على خاطر هي طيبة وباهية.

وكي تلقى الناس هذي اللي بعثهالك ربي باش تكون معاك بقلوب صافية ونية ما تتمنى كان الخير، اول حاجة احمد ربي على هالنعمة اللي سبحانو يسخرلك ناس تعاونك وتقولك ما نخليك في لحظة الضيق، وثاني حاجة اعرف انك تملك قلب طيب ونية صافية ونقية تتمنى الخير لغيرها، ما تحسد وما تحقد بالعكس تفرح وتدعي للغير بالخير وعلى هذيكا ربي يعطيها السعادة وكل خير.

في وقتنا توة كانا خلوك تندم على نية صادقة منحتها لانسان وما قدرهاش، ما تخافش وديما خلي روحك طيبة كان ضاع عند الخلق عند الخالق وتأكد انو ربي سبحانو ما يخليك ويجي نهار ويعوضلك عليه بما خير، صحيح ساعات تجينا أوقات صعيبة تخلي النفس حزينة بفعل ناسها اللي تقلبت علينا اما كي تتفكر انو وجود ربي وحدو يخليك تفرح وتتفائل بلي جاي خاطر تستنى فيك ايامات الكلها زهوة وفرحة وبسمة ونجاح.

سامح وخلي قلبك صافي وتأكد انو ربي يبعثلك ناس كيما طبيعتك، حبّ الخير يجيك، وعاون الناس وخلي البسمة اول ما تشوفهم، تجيك البهجة ولو طال طريقها وزمانها، افرح بلي عندك، بناسها وبنعمة الله عليك، شوف غيرك توة تعرف قيمة اللي بين ايديك وانت مفرط فيه، ما تخلي حتى انسان يتحكم في فرحتك اصنعها وما تستنى من حدّ يعطيهالك، إلا من المولى سبحانو.
عيش عيشة بسيطة بتفكير صافي ،وراحة بال ومتخافش ملي جاي مادام القادم اجمل والحياة ابهى.