معرفتكش .. تبدّلت حتّى لين معقلتكش -

أنا تبدّلت ؟ -

أي علّخر زادا !! خسارتك ساعة كنت محلااااك , علاه تبدّلت ؟ -

مش منّي .. -

امّالا من شكون ؟ -

منهم هوما ... -

شكون هوما ؟ -

هوما الّي في غفلة منّك اغتصبوني تحت الساقين عفّسوني , هانوني , مرمدوني, خانوني, و في كاس الحنضل رموني ... -

وقتاه هذا الكل صار ؟ و أنا فين ؟ -

انتي و هوّ و هي راقدين ههه ... -

مفهمتكش.. ؟ -

موش لازم تفهمني , المهم أنا ماعادش كيف قبل , أنا أغلى ما فيّ تقتل , أنا حرقوني , غدروني , ذلّوني و ولادي هجروني

ولشرهّم خلاّوني ..

علاااه؟ شكون الّي عمل فيك هكّا ؟ -

تي هوما ... -

شكوون هوما ؟؟؟؟ -
متقلّيش شكون هوما قلّي علاش ولادهم ماتت علا جالهم و ولادي خلّوني في حشومة ؟-

يااما وكّلت و حضنت و سقيت و انتي و غيرك من بلا الغريب حميت , فوق ظهري تبنات مدارس انتي و غيرك فيها قريت و على كتافي حيوط دارك علّيت , و غادي فين خضاري شفتك كيفاش تلحّفت نسمتي , توسّدت رملتي , تفكّرت همكّ و همي و بكيت ... ما تنكرش

ما ننكرش ...صحيح .. -

ملا ما تقلّيش شبيه داخلك كلّو وجيعة و قلبك من اللّيعة يصيح, ما تسألنيش علاش أوراق أشجاري صفارت و بدات اطّيح و بربّي ما تحكيليش على ثورة الياسمين..وياسميني كيفاش ريحتو بدات تشيح ..أحكيلي اش باش يصير فيكم ؟ و كان "هوما" محوني أنا لشكون يا ضنايا باش نخلّيكم ؟ مهما عملتو فيّا نقعد نحبكم اييي نحبكم و بروحي نفديكم ..حتّي لو كان جفّت بحوري و بقات منها قطرة . و ذبلت جنايني و بقات منهم وردة.. نخبّيهم , و نزيد روحي عليهم و نعطيكم....

هذا الكل يا تونس ؟ يا بلادي .. يا أغلى ما عندي , يا أمّي .. -

أمّك ؟ أمّك قاعدة تموت .. زيد أرقد حتّى يفوت عليك الفوت -

قلّي شنعمل ؟ -

شتعمل ؟ أعمل جوانح و طير , علّي صوتك , أطّرشق , نعرفك قوي .. مانعرفكش تحير , نحب نشوف نجمتي تلمع و هلالي ضاوي و الأحمر على جالي يزيد , نحبكّ علّي طغاو قلبك حديد نحبّك تحط يدّك في يدّ خواتك و أصخابك , جيرانك و أحبابك و تكتبولي عمر جديد .. مازال عندي ما نعطيك .. مازلت فيّا روح من البلا في المستقبل باش تحميك.. و مازال فيّا أمل أنكّ تهنّيني و نفخر بيك

أنا شعبك يا تونس.. أنا ضناك , أنا روحي و دمّي فداك .. نوعدك , اليوم قبل غدوة نحررّك و نكون نجمة ضوّيا في سماك