هي حلوة و عليها ضحكة سحارة... لسانها يقطر عسل و على عينيها غزرة ذبالة... لا عمرها إمنت بالحب و لا نهار عشقت في الرجالة... كيف يجبدولها على الحب تضحك ... و تهز حواجبها بتبسيمة مسرارة ... هي صحيح وجها وجه ملايكة لكن قوة قلبها بالجبال الرواسي..

. و مالشي إلي شافتو من بوها في أمها شطبت على الماخذة و الحب قالتلو أخطى راسي... قرات و تعلمت ... كبرت و خدمت و لا نهار في فكرتها سلمت... جيوش بالصف وراها و هي كينها راضعة معاهم الحليب...

الكل كيف أخوتها و لا نفع معاها نصيحة صاحبة و لا كلام قريب... "في حياتي ما تدخلوش يبارك فيكم... آنا حرة في قراري و إلي نفكر فيه خاطيكم... إلي عانيتو في حياتي من بابا كرهني في جنس الرجال... ضربو و سبو و شتمو و همو ... ما نسيتش و عمري ما ننسى كل شي عملو في أمي و أمو ... و ما نسامحوش على حرماني من كل فرحة يتمناها كل صغير...

تحبوني ناخذ واحد يعمل فيا كيف ما عمل بابا في أمي.. تحبوني نعاود السيناريو و نجيب طفلة تعاني نفس إلي عانيتو آنا في صغري... !!؟؟"

و هكاكة كل ما يجي يناقشها حد حتى من أمها تقلهاأنسى ما حكيت ... قرايتي راجلي و خدمتي هي أولادي...

ركحت أمورها و سافرت تعمل في الدكتورا متاعها في بلاد أوربيا... و كيف عادتها لسانها سكر و طبيعتها كلها براءة ... الشي إلي خلى الناس الكل يحبوها و يتمناو يسمعو هدرتها و يشوفو تبسيمتها و ضحكتها...

حبوها بنات و أولاد... فيهم إلي يعشق هواها و فيهم إلي كيف أختو يخاف عليها ... في قرايتها مكورجة و حاطة في قلبها... و ميمتها بالخير تدعيلها و على روحها ديما توصيها... فتكم بالحديث بوها إلي كرهها في الرجال الكل هزو ربي عندو و ان شاء الله بالمغفرة ... دمعتين رحمة على روحو بكات عليه و كملت حياتها...

-----------------

هو جاي من بلاد الحرب ما خرج منها ألا ما ودع عيلتو الكل تحت التراب... قلبو برغم طيبتو فيه بارشا وجيعة ... عالمو ديما ساكت ... وحدتو عاملها سياج مدورو بيه باش ما يخالط حد... على قد ما ربي عطاه زين و شبوبية على قد ما همو كبير و كل ما يتغكر ضحكة بوه و دعيوة أمو يغم عليه قلبو و كل ما يجي باش يحكي لخوه الكبير ينسى و بعد يتفكر إلي هو بحذاهم زادا... يرجع يلعن الصهيون و الحرب و الدمار و السلاح منين هب و دب... و يتمنى كان جاء من بلاد أخرى ...

تعدات عليه فترة صعيبة بارشا واجهها وحدو ببارشاصبر و قوة عزيمة ... بدموع الرحمة عليهم و دعاء الخير...

خروجو مالبلاد خلاه ينسى شويا أو بالاحرى قرايتو لهاتو و الهدف متاعو باش يولي عالم كبير بملك ارادتو خلاه ياكلو كل وقتو...

حيوط دارو في الغربة كتب و كراسيها كتب و كواترواتها كتب ... شرابو قهوة و كتب ... و ماكلتو زادة كتب ... آخر ما يفكر فيه بعد إلي شافو و تعدى على راسو هو البنات و الحب...

------لكن الحب بيناتهم مكتوب من أول الدنيا حتى من قبل ما يجيو و يعرفو بعضهم. ..

و المكتوب ما منوش هروب...

و كلام العين سحر ياما قرب قلوب

ستناو ج.2 و شوف شنوا باش يصير