ليلة ظلمة....الحس بايت ....

شاردة..الڨلب معبي و ناري ڨايدة... على حال البلاد ناس بكات و على خاطر الكراسي الدنيا خلات ....

قلت خليني نكتب...خلي نفرغ هالقلب إلي تكدر..

خلي نحرر هالمخ إلي تخدر ....

قلت خليني نجرب نعمل فن .... موش يقولو التعاسة تخلق الإبداع !

أكثرشي من هكا تعاسة ؟؟؟ ..

وحدي و حس هالمنڨالة لي بجمبي صدعلي راسي،" توا زعما ... حس هالناس إلي في الشارع ما وصلهمش ؟

زعما دم الناس إلي مشات ما مسخهمش ؟

زعما دمعة كل أم عطات ولدها ما حرقتهمش ؟"...

و ندخل في صراع داخلي ما نفيق بروحي كان الدمعة ع الخد ...

الحيل تهد ... حتى هو دمار .. الأجبال يهد ....

و نتذكر.. نتذكر لي عمرتعدى و مازال فما شكون متخبي ...  

خايف يتكلم و راضي ..قال شنوا هاذا إلي كاتبلو و هذا إلي عطاه ربي ..

و إلي يحب الدنيا و خايف يقول راني نحب نعيش... و إلي عطات كبدتها و قالولها ولدك مات شهيد، ما تبكيش .. ولدك شهيد ، اليوم عندو عيد ...ما تبكيش ما تبكيش .. ولدك شهيد..

خلي عاد نزيد نتذكر إلي عاش يخيط في حلمة و يقول غدوا حلمتي تخرج مالظلمة ... تشوف نهار جديد ، نحل بيه البيبان و كل يوم في حياتي يولي عيد ... و نتذكرك يا بلعيد ... نتذكرك و نقول غدوا نهار جديد ، صحيح تمرمدنا، بكينا ، ضعفناورخينا أما الكفوف تفيق و تعلم يا زعيم ...

و نزيد نتذكر شهيد الوطن الثاني، الوجيعة تولي وجيتين، على شكون نتحسرو ماناش فاهمين، وقتاش النهار الجديد ماناش عارفين... أما ماناش مسلمين، في دمكم ماناش مسامحين ...
نقول خليني نقدم و يزي مالدم... نبربش في الذاكرة حاجة تفسخ هالألم ....

و نتذكر هاكا الولاد الصغار لي نلقاهم الصباح في طريقي و أنا ماشيا نقرا نكركر في ساقيا ... ولاد صغار أما من هم الدنيا كبار... القلب تكوا من عيشة الذل و الدمار ... صغار أما في الجواجي برشا خنار ...

زعما كيف يروح يلقا ما ياكل ؟؟ يلقا وين يرقد ؟؟ زعما بردان !!! زعما هالقطعتين إلي لابسهم مدفينو !!! ..... لين نلقى روحي جمدت في بلاصتي و الدمعة تحصت في العين ... نضعف ، نفد ، نحس روحي كرهت الدنيا ....

و نقول خليني نقدم... أما وين نهرب وين ؟؟؟؟ نقدم و ننسى لي ريتو ! ننسى لي تعدى !!

تي كل قطرة دم سالت أنا، كل رصاصة تضربت أنا، كل دمعة هبطت أنا، كل مرا عانات أنا ، كل أم على وليدها تشوات أنا....

كل حلمة حبوا يحرقوها أنا..

كل دمعة فقير أنا...

كل لقمة جيعان أنا ...

كل غطاء بردان أنا ..

كل وعد تقال أنا .... ما نجمش نتعدى و ننسى القديم ..

ما نجمش ننسى إلي في ديار الريف دمعة حارقة ... دمعة يتيم ...

على هاذاكا ما يلزمنيش نضعف ...ما يلزمش الإصرار يخف....ما يلزمش الحبار يجف ... ما يلزمش النفوس تترخف .... يلزمني نكمل هالطريق ... الطريق إلي ترسم بالدم و إلي تكتب بكلام منحي ماللحم ...

باش نكمل ... باش نقاوم ... باش نقاوم بورقة و ستيلو و كتاب و علم و فن و إبداع و صوت ... صوت في كل يوم يعيط " سنمضي سنمضي  إلى ما نريد ، وطن حر و شعب سعيد " صوت يعيط و يقول " لو كان الفقر رجلا لقتلته" صوت يزيد يعيط و يقول " مازلنا واقفين " ... ... صوت مش باش يسكت ... صوت يقول القضية قضيتي و الطريق طويل ... كون قوية و قاوم .. راك صاحبة قضية