يدي في الززوة و ريحة القهوة تفحفح... تذكرتك تمشي و تجي قدامي و تترشف فيها كيف عادتك و غزرة عينيك من عليا ما تقامتش..  من فوق الفنجان ربثتني غنوجية عينيك...

نغمة تذكرتها ياما سمعتها في صباحاتنا... حروفها خارجة لا رحمة لا شفقة من بين شفايفي في بالها تواسي فيا  لكن وجيعة ذكراها تقتل...

بعد إلي شفتو منك كان لازم تكون تفسخت من حياتي..

لكن يظهرلي إلي يمشي كل شي يحضر في غيابو.. إحساسو، عاطفتو،  ذكرياتو كل شي يتضاعف كيف كمشة قطانيا و رميتها في زيت سخون...

تحمى و تحمى حتى تطرشق و تخرج إلي مخبل في الكبة الكل... تخليني نحل صندوق سكرتو من بعد آخر في الأمان سمعتها منك .. أكثر حاجة تخليك تتذكر هي إنك تحب تنسى تقول

متحالف مع النسيان عليا ... شنوا نعمل؟

نطيش إلي نحسو في بحر غارق و نهرب على الشط بعد السماء على الأرض باش موج الأفكار و الذكريات ما يرجعليش ملح الوجيعة  على جروحي الخضراء  ؟ ...

و إلا نشد ثنية الدنيا و نرمي ورايا  حلاوة حبي ليك على طريق بكلو عصافر ؟

يجنحو بإلي يقدرو عليه لسابع سماء و نرتاح و نفهم  إلي ما فماش علاش نستسلم للضعف  ..

ما فماش علاش نكون حساسة أكثر ماللازم..

ما فماش علاش نملى عنيا بالدموع...

ما فماش علاش نتأمل إنك ترجعلي  بعد ما شريتك  و إنت بعت...

بعد ما بنيتلي قصر بالرمل و قمت هدمتو في لحظة و مشيت...

بعد ما غلغلت عروق المحبة في جواجي صافية و نقية... بعد ما حللت الشر إلي عملتو فيها ... و حرمت الفرحة عليا ...

علاش تجيني في كل لحظة ما نتماناش نشوفك فيها...

علاش كي نتخلص من إدماني ليك و نقول بريت تبت عليك ترجعلي كيف القمرة بعد ليالي ظلام؟؟

تعبت مالفراق و من بعدك لكن ما بيدي حيلة تحسم الحال بيناتنا ... و هكا حبيت و هكا رضيت...

يزيني  ما عادش نقمر على فارس الأحلام لا حاشتي حتى باش نزيد نشوفك  في المنام...

كرهت كل حاجة تذكرني فيك ما عادش نقمر على المحبة الخالدة إلي وديتني بيها و بعد ندمت  و سرقتها...

ماعادش نخلي شبابك قلبي محلولة باش نهبط عليهم ريدو أكحل و نسكر الباب و نطيش مفتاحو في أغرق بير...

رد بالك ترجعلي رد بالك تبربشني...

خليني راكدة كيف ركحة الماء بعد مطرة عاصفة في أبعد بقعة  تنجم تلقاني فيها  على الأرض...

غيب بلاش رجوع لا في اليقظة لا في  النوم...

غيب و هز معاك الذكريات  المعتّقة في بالي و قلبي و رتحني...

ش ش ش ش ش...

فاضت الززوة و فاض القلب بإلي فيه ...

خرجت كل الليعة و مشى الخيال يكركر في حبل الذكرى إلي خلاها تتعلق بيه...

الحب كيف القهوة بنّتو كيف يطيب على هداوة لا يفيض و تنقصو غلوة...

صبت القهوة بإلي فيها مع الماء تجري بين السواقي و عمرت ززوة جديدة و قهوة جديدة و قلب جديد  بلاش بيه...