Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

قلت نكتبلك

lettres-amour-purOumayma Rjeb - أميمة رجب

قلت نكتبلك ؛ مادام قالو الكتيبة توصل قبل الكلام ؛ حلمة مزيانة راكشة تحت جناح المنام ؛ مادام الصّوت يعجز قدّام قوّة الأقلام ..

قلت نكتبلك ممكن كلامي يأثّر فيك ؛ ساكن في معانيه يخلّيك ؛ بالك قلمي بحبّو يرويك ؛ بالك يدّي تنجّم على ورقتي تفهمك و تسمّيك و من بنّتها تسقيك .. 

قلت نكتبلك كيما كانو يعملو ناس قبل ؛ يفرّغوا في ورقة صفراء حبّهم و مشاعرهم الكلّ ؛ كلام مسيّب في فمّك يتشكل ؛ كلام ألغاز بين يديك يتحلّ ..

قلت نكتبلك بالك الثلج الي فيك يذوب على النّار الّي لاهبة في ورقتي ؛ بالك حروفي تخلّيك تحنّ ليّا و لبسمتي ؛ بالك عينيك تتوحشني و تضوى بهواك من جديد شمعتي ..

قلت نكتبلك على ضوّ القمرة و النّجوم ؛ بلهفة عاشق من حبّو محروم ؛ بتعب عين ساهرة متوحّشة النّوم ؛ بوجيعة قلب من هالدّنيا مظلوم ؛ بفرحة روح بيك حيات بعد ما قتلتها الهموم ..

قلت نكتبلك بروحي ؛ غناية اسمها يا دواء جروحي ؛ 

قلت نكتبلك  بعروق يديّا  ؛ كلمة مفوّحة بورد خدّيا ؛  فقرة تهدّ الجبال الّي من وحشك متكية عليّا ؛

قلت نكتبلك حكاية عنوانها نحبّك يا ممّو عينيّا ؛ توحّشتك يا روح في دمّي تسري فيّا ..

قلت نكتبلك