كل منقول عندي مشاكل في حياتي تطلع قدامي الف حكاية توريني قداه مشاكلي تافهين. اما مكذبتش كيف قلت بلادي بلاد طحانة كان مجاتش بلاد طحانة راو موش بنت ١٣ يغتصبوها و تحبل و باش اغطيو عل "فضيحة" يبيعوها للي غتصبها و ايمنعوه مالحبس .

تي حيوان كيفاه دافعوا عليه ميصلحش غلطتو محشتيش بيه باش اصلح حشتي بيه احس الي حستو هاكا البنية حشتي بيه يشرب من نفس الكاس . علاه مسمينها فضيحة تي بنية مزالت مرات مالدنيا شي تعداو علاها و على حقها في الدنيا حيوان هبطلها دمعتها مخممش في حتى شي تي نشك كان عندو مخ راو لملام موش كان عليه دارهم الي باعوا بنتهم باعوها باش اغطيو على مجرم باعوها باش الناس متحكيش عليهم باعوها باش العباد متغزرلهاش على جنب .

تي فاش تحكيلي في بلادي الضالم اولي مضلوم في بلادي يقتلوا الميت و يحضروا في جنازتو في بلادي خاطرك بنية متعيشش متحلمش متتنفسش في بلادي خاطرك بنية لازمك ترضى بحكمهم خاطرك بنية تحكم فيك نقبة سوى عطيطها بكيفك ولا خذوها بالسيف . علاه علاه هكا انا مرا اما نقبة موش باش تخططلي مستقبلي و موش باش طيحلي راسي احنا نساء احرار باش ناخذوا حقنا بالسياسة ولا بالقوة كيما تحبو دمرونا