قالولي إلي الموت يتعب الحيين مش إلي ماتوا

وكلمة بالسلامة مش هي إلي توجع ، إلي يوجع يتفكروك ولا ينساوك

قالولي مرة زادة العبد ما يبكيش إلي هو خسر عبد قد ما يبكي على قداش بش تفرغ لبلاصة وشكون بش يعبيها ووقتاه

نتفكر مرة تحطيت في موقف موت وحسيت الدنيا ضياقت عليا

حسيت إلي إن مسامحة الناس الكل ونحبهم وإلي ضلمني نحب نبوسو و ونقلوا انا سامحني

وقتها حسيت قداش الدنيا صغيرة وخايبة وما تسوى شي ونحنا نشريو فيها بكل شي

حسيت وقتها قداش توحشت العبد إلي خاني وخلاني ومشى وحسيت نحب نهز تليفون ونقلوا فرحتلك كي لقيت إلي تفرحك أكثر مني

حسيت إلي انا توحشت صحبتي وأختي إلي فرقتنا لايام وحكايات الدنيا على بعضنا

قداش توحشت وقتها نراها ونعنقها ونتلكش عليها ونرفزها ، توحشت نحط تصويرتي انا وياها

توحشت نعمل حاجات من غير برشة تخمام ، حسيت قداش ضيعت من حياتي نخمم فالناس اش يحكيو وخايفة لابدة في تركينا

قداش من مرة حبيت ناكل حاجة بنينة وخفت نسمن والناس يقولولي يا دبه

ندمت عالهبال إلي ما سيبتوش

كي وقفت على حافة الموت وريت فيلم تلخص في دقيقة ... فهمت الدنيا وفهمت إلي أصلاً ما تفهم الدنيا إلا ما توصل غادي

نتفكر مرة مشيت وحدي فالزنق فالليل خاطر رجل كبير قلي تكبس نحي الخوف

نفسو في مساق حديث قلي حط ربي فبالك ، كينو عينيا حكاولو ، قلي إلي العمر مادام متصالح مع الدنيا ما تخافش ، مادام عندك علاش تخاف وشكون تحب ما تخافش ..

عمي الشايب قلي ، مادام مازلت تسمع في حكايات خير ، ما تخافش

قلي إنت ضحكت الصدفة إنت زين الغفلة وشمس المطرة إنت نور حياتك ، ما تخافش ، انت بنتي وبنتي ما تخافش ، يا بنتي ... فهمتني ??

وانا عالحافة تفكرت عمي الشايب وتفكرت أهم حاجة قالهالي قبل ما يخليني ويمشي ، بينك وبن حياتك خطوة ، ما تخافش ..

بقلم يسرى عز الديني