فكّر بغيرك

سنيا زيد - Sonia Zid

شعب بكّاي شكّاي ماو عاجبو شي

أما كيتجي حكايه متاع ماكله يولّي ولد البيّ

مشوي و لحم و الفمّ ديما محلول

بعد ما نفختولنا ريوسنا بالعلّوش وصل للمليون

و إنت تنفخ في العلّوش فكّر بغيرك

الّي نفخ كرشو بالخبز البايت و ريحة المشوي الخارجه مالتّراكن

وإنت تسلخ فيه فكّر بغيرك

إيديه و ساقيه تسلخت عل خبزه باش ولدو مايحسّش بالنّقص قدّام صغيرك

و إنت توزن فيه شايخ فكّر بغيرك

الّي حاطط ميزان قدّامو يخدم بيه يستنّى في صدقه من خيرك

ما تحقروش و ما تبخلش عليه بلحمه

راو هذا عيد مشوي و زاده عيد رحمه

و إنت تلوّح في جلد العلّوش فكّر بغيرك

على لحمو ما لقاش باش يتغطّى

قدّاش من ليل بارد سارد على عايلتو تعدّى

أما عمرو ما شكى و وطّى راسو و قال شنيّ هالعيشه و ركبتّو الفدّه.

وإنت بريحة الدّواره مخنوق خمّم بغيرك

بهموم الدّنيا مشنوق

يحسّ في عمرو منّو مسروق

لا خلط على دوٌاره و لا كرشه و حتّى مل ريحه محروم

و إنت تخمّم في كميتك و شربك ليلة العيد فكّر في الغير

كميتو هيّ ملزّبلة فظلتك و شربو مل ماجل و كان سلّكها

يلقى بير

من زبله لزبله يلوّج باش يعبّي كريشتو

مش كيفك مش عاجبك شي و في تركينه متّكي كالزّير

وإنت مع عايلتك ملموم و زاهي

فكّر بغيرك إلّي بدموع صغارو مهموم و لاهي

ما شرالهمش علّوش

مل قهره قدّام حزنهم ولّا بكّوش

أما صغارو ليه ما سبّوش و بفقرو ما عايروش

رقدو و الغصّه في قلوبهم اما على مابيه ما زادوش

خمٌم فيهم و حنّ عليهم

صدّق باش الفرحه تلبس عينيهم

العيد راهو سيف يقسم ظهر الضّعيف و المسكين

فرحتو تملى الدّيار أما زاده تحيّر لكدار

كلّ عام و إنتوما حيّين بخير

و ما تنساوش ما فيها باس كان تعاونو الفقير و تخمٌمو فالغير

بقلم سنيا