الأربعة متاع الصباح ولتو ما جاني نوم ، تقلبت وتشقلبت ، شي ، كاينو شكون داعي علي

ولا لا ، ساعات تسمع كلمة صغيرة تخليك فايق ليل كامل ، عادي ، يصير ،

المهم انا ناقصة وزدت على روحي ، حطيت غنا عندي سنين ما سمعتوش ، رجعني لتالي برشة ، وبرشة مواجع تحيرت علي ، علاش ؟ ما نعرفش لحق ، انا هكا عندي شلل في اللوجيك متاعي ، كي نبدا متقلقة لازمني نزيد نقلق روحي

كي ما لقيت بيها وين هاني قمت كي السارق مشيت عملت كاس حليب دافي بالعسل ، علامة بابا هاذي ، ديمة الحل المثالي إلي يلقهولي ، كاس حليب دافي بالعسل ، باهي بابا ، لحليب يرتح لعصاب والبدن ، أما ينسي ؟ ينحي وجيعة ؟ لا يا بابا ، في هذي ما جبتش فيها ، سامحني

فاش نخمم ؟ bon شوف خممت في برشة حاجات ، خممت في أول واحد حبيتو ، خممت في حياتي قداشها باسلة كي منظري ، خممت غدوة باش بش ننصح صاحبتي إلي لليوم محبتش تنسى العبد إلي جبد بيها ، نحب نقلها ، شبيك واقفة في بلاصتك ، علاش ؟ سامحني شكون كذب عليك قلك راو كي إنت سيادتك ، تاقف وتستناه سنين لين تشيب وتكركم ، الدنيا بش تاقف ، هههه ، بربي تلفت لجنابك ، لا بالحق تلفت لجنابك ، تلفت ؟ أش ريت ؟ ، ماو ناس تمشي ، شمس طالعة هابطة ، أذان يمشي منظم ، والوقت ماهوش واقف ، يتحرك ، ا تك توك متاع المناجل بش تنقبلك وذنيك و- انتي شبيك ،، ،، علاش واقفة ؟ يوقف سعدك كانك عبد ؟ تي إلي واقفة على خاطروا بيدو تحرك هههه أوه عليك أوه يا ناري ؟ جبت العار للنسا ؟ يذلك كما تقول مماتي ،

سامحني إنت راضية على روحك ، بن هاو سؤال أسهل ؟ كي تاقف قدام المرايا ؟ شتحس ؟  ما تحسش ساعات إلي انتي تحب تقتل روحك ، ريت إذاك إلي تحس فيه ، منك ، خاطر انتي وحدة ماكش عايشة ، ناقمة على روحك ، تي كيفاه تحب ترتاح وانتي مع روحك ماكش صافية

برى شوف حل لحياتك يا عله ، تحرك ، أعمل حاجة ..

وه ! شبيني انا ، دخلت فالطفلة فرنتزي ، هههه ، تي مو اكاك العبد كي يحب يوصل معلومة لروحو ، يعمل هكا للعباد ، زعمة زعمة ، الكلام عليك والمعنى على روحي

بقلم يسرى عز الديني