اخترت تبعد؟ مالا بش يجيك نهار تحل عينيك الصباح و تترسملك تصويرتي بش تدخل بعضك و تتقلّب على جنبك اليمين اكا التصويرة بش تولي تتحرك تمشي و تجي و تترشق قدامك بش تتقلّب على جنبك الآخر التصويرة بش تولي تتكلم و تقول في كلام مش مفهوم و مع كل كلمة تقولها قلبك بش يعصر عليك و يوجعك أكثر ,

بش تكتشف الي انت ضيعت حاجة عزيزة عليك حاجة في نهار مالنهارات كانت متاعك وحدك و الناس الكل حاسدينك عليها,  اليوم نفس الناس قاعدين يضحكوا عليك كيفاش سلمت فيها من غير لا حد ضربك على يديك,  في النهار اذاكا بش تبدى تفرفط كيما الحوتة الي خرجوها من ماها,

بش تقوم تجري تلوج على حاجة من ريحتي حاجة تذكرك بيا فماش ما تصبر بيها روحك لين تلقاني ماكش بش تلقى شي , نهارتها بش تكتشف الي أنا تخلقت على خاترك و انت تخلقت كان ليا أنا,  نهارتها بركا بش تندم على السنين الي بعدت فيها,  نهارتها بالذات بش تصب مطرة قوية باش تخرج كي المهبول تلوج عليا في الشوارع و الشتاء خيطين من سماء وقتها بش تذوق برد عمرك ما ذقتو ماكش بش تلقاني بجنبك نسكرلك في كبوطك و نلف عليك,  ما ناقصك شي الي تبكي عليه العباد عندك المال,  القبول,  الأصحاب,  أما بش تحس روحك ناقص و الي يكملك ما يتشراش بمال الدنيا,

بش تندم على الصبية الغنجة الي حلت عينيها فيك,  نهارتها باش تلم فاليجاتك و تجيني,  باش تحكيلي قداش عانيت و انت بعيد عليا و كيفاش ما مسيت حتى مرى بعدي,  باش تقلي الي النساء الكل ذكروك بيا و حتى وحدة ما ملاتلك عينيك قدي,  بش تبكي اكثر من آخر مرة ودعتني فيها أما المرة هاذي مانيش بش نمسحلك دموعك بش نقعد نتفرج فيك, مش كل يوم يعرضني راجل يبكي عليا,  خليني نستمتع بجمالية المشهد الراجل الي طيشني عامين لتالي على طول يدو اليوم رجعلي يبكي طالب الرضى من عينيا.
أي و انا شنوة مطلوب مني؟  نعم؟ ننساو الي فات و نرجعو؟

سامحني فات الفوت,  الدنيا هاذي فرص و انت فرصتك جاتك مرة و ضيعتها,  باش تقلي مش منك و ظروف لزتك؟

  نقلك حتى أنا تلزيت و من حقي نرتاح يزي ما تعذبت و خسرت في جرتك,  يزي ما حزنت و ما لبست الاكحل يزي ما كتبت عليك يزي ما حلمت بيك,  اليوم نحب نعيش و نلبس الوان زاهيين,

شاهية نضحك عندي برشا ما ضحكتش ضحكة مالقلب,  شاهية نكتب حكايات نهايتها سعيدة شاهية نتحب و علاش لا نحب,  اليوم تولدت من جديد اليوم خرجت مالقفص الي حطيتني فيه و خليت الباب محلول و انا من بهامتي و محبتي ليك عجبتني القعدة غروني شوية ذكريات عشناهم زينت بيهم تراكن القفص و عماوني علي ثنية الباب,  اليوم جيّتك عاونتني و خلاتني نتحرّر,  اليوم كي ريتك أيقنت الي انت مجرد تجربة فاشلة خرجت منها ببرشا دروس,  

اليوم تولدت من جديد اليوم خرجت مالقفص ...

بقلم ديمة الرياحي