غشيرة و الدنيا عجاج
Nawres Zoghbi - نورس زغبيالدنيا مغبرة عجاج يعمي عينين الناس …
و الهلواس عمل ساقين و صبح عساس …
كي الوسواس غنا في وذنك رڨدت في تبنك مع الخناس …
و صبحت لا تفرق ناس من ناس …
مادام عينيك عاميها الهلواس و زاد على مرمتها الوسواس الخناس …
الدنيا مغبرة عجاج …
و الثنايا فجاج …
لملم حكاياتك لمبعثرة و غناياتك لمفرتة …
و انت طراطش دمك على لحيوط …
مدغور ؛ مسعور ؛ منكوب ؛ و السعد مكبوب ...
و انت مالك كان حلان الصرة و لمان لخيوط …
في محبتك جايبها عزري …
مصيرك تتكب على وجهك و نڨول آ عڨري …
سيب علينا استوى روحك مع المكتوب …
مادام العيشة سوردي منقوب …
الدنيا مغبرة عجاج …
و الثنايا قحط فجاج …
ذيول الكلاب تتستوى في الڨبر …
و الزمزم متحزم للحجاج …
حتى الضحكة غابت على المطر …
سيبنا مالايام و المر و السهر …
بيت الحس و حب لعباد و ادغر ربهم في الظهر …
حندرتك ليام على طول الثنية …
عشعش فيك العفن مع ها الفية …
تلم و اخطانا مدام الدنيا عجاج و انت تدعدس …
سيب عليك مني الي بيناتنا طريڨ فجاج و اڨعد تحسس …
و انت عاميك الهلواس …
و انا فري ڨلبي غشيرة بين الناس …
اذهب انت لا وليت …
تڨعد فز راني من همك فديت …
بقلم نورس زغبي
Website Design Brisbane