راسي وجعني  حتّى عينيّا ولاّو  يحرقو ليل كامل  مرقدتش  وجيعة  في لحمي  الكلّ و اطرافي  تنمّل ما فهمتش ..  رااااسي  الوجيعة  ولاّت  صاحبتي  و الشقيقة كمّلت  على غربتي  ساكنة فيّ  قالولي الوجيعة في الراس من التخمام اما انا لاباس  حياتي باهية و الحمدالله  متهنية  في داري ربّي نعم عليّا براجل خير من النسمة  ورزقني بالذريّة الصالحة  و حمدالله ..

-  اعمل تصويرة  و جيبهالي  هاو الكلينيك اللي نخدم  فيه و فيه سكانار زادة

- علاش شاكك في حاجة

- هههههه الطبيب خدمتو كان يشكّ

دخلت البيت الكلّها ضو و ماكينات  فيها فرش

- نحّي حوايجك  و البس لبلوزة  و اطلع فوق الفرش

طلعت  نزلت  على فلسة  دخلت  في  مكينة  كانّها  ميكروند  مسمعت شي حسّ عادي خرجت ورقة  من اصلي منفهم شيّ في السيونس  

- لاباس امان عيّش اختي

صفارت  

- منقلّك شيّ توّ الطبيب يفسّرلك كلّ شيّ

يخزرلي كيما اوّل مرّة تقابلنا .. يثبّت فيّ .. حبّ كبير بيناتنا .. خايف عليّ ..

- مدام  لاباس؟

- منعرفش  بديت نتقلّق

-متخا..فش.. ام ام.. مسيو  تجيني  لحظة

- شوف  متخافش عليّ دكتور . . الوجيعة  نعرفها  و الكنسار قريت برشة عليها و عندي برشة عوارض اما  نداوا ولاّ لا ؟

- حالتك ما فيهاش دواء انت حالة على مليون

- انا ديمة الحالة الي على مليون في كلّ شيّ

- سبحان الله تكوّن و سرح في 3 ايّام  ربّي معاك ربّي معاك

خرجت نكركر في ساقيّ   غريبة شبيني ؟ ما صحتش ما بكيتش  ما عملت شيّ .. هو زادة ما قال شيّ  شدّلي يدّي .. عشيري  نصدّقو في كلّ كلمة في كلّ خزرة  الدنيا معاه حاجة

اخرى اما توّة بش يقعد و حدو .. زعمة يعرّس .. النساء عالم اخر الموت جايتني و انا نخمّم  فيه ياخو بعدي بصراحة  منحبّوش يعرّس .. و بناتي كيفاش حياتهم بعدي يتامى .. بلاش امّ ..

وامّي  و اخوتي ..؟؟؟

- امان هزّني  لباب بحر خلّيني نتفرّج في الماشي و الجاي  و النطّار و اللّي  تعمل في الحرقوس  واللّي يبدّل في الفلوس تحت الحيط نحبّ ندخل للاسواق نحبّ نقعد تحت المسرح البلدي

غريبة عمري الكلّ في تونس و عمري مدخلت للمسرح ولاّ حتّى قعدت تحتو .. البنات في مخّي .. نسمع في اصواتهم   ماما ماما .. اعطيني  تروس الماكياج.. اخوتي ثمّة حاجة غريبة بين

الاخوة .. امي تخزرلي .. بابا سارح ..ديمة قويّ .. يتكيف و يتنهد قالي ساقاي تقصّو  مفهمتوش .. توّة فهمتو الكبدة يعطيها كيّة ...

- شفت ديمة تعطلني  كان جيت تسوق راك تهزّ الكرهبة ؟ كلاسطي  وين

حمدالله نحلم توّة رجعت للدنيا .. مدام راجلي يخرنن على كلاسطو  خاطر في الدنيا الاخرى  منلبسوش كلاسط..