عهدي بروحي عملت العشرين و فارحة بها و طايرة..فرحانة بالجامعة و بالاصحاب الجدد و الدنيا الجديدة و مفقتش بالوقت نلقى 7 سنين تعداو...

تخبيت و قعدت نتفرج في الاعوام تجري هاربة مني

تكلمت و ما سمع حد و كتبت و ما قرى حد

حبيت نصيح و نطير...نجري و نطيح

تسلسلت و التوا السبب ما عرفت

تمنيت و ما لقيت...بكيت...تخنقت...ووحدي غصيت...

يطيح الليل و تطيح معاه دموع تخبات من الضوء..خافت تهبط و تتسال على السبب

خافت تهبط في النهار يتلمو عليها العينين و يكثر الكلام شكون السبب علاش و كيفاش ووقتاش

الكل يحب يسال اما حد ما يحس

كرهت النهار نخاف نتسال شبي العينين حمر

علاش بكيت و شكون بكاك

نخاف نجاوب و حد ما يفهم و لا يحس

ونجاوب شنية نقول ؟

انا بيدي نسيت...نبكي علي تعدى و الا على توا والا علي جاي

نبكي عالبطالة و الا على الحب الضايع...على الاحلام الي ما شافتش الضوء و الا على السنين الي تعدات في الفارغ...