كي تخرج من علاقة وفات بناهية مدمرة ممكن خلفت وراها برشا وجايع و اضرار نفسية كبيرة ...

علاقة كارثية ...تمارس فيها الحب بجميع انواعو(حب مش حاجة اخرى) تشمل التضحية و الصبر و الوفاء و أسمى معاني الحب ...

اكا الحاجات اللي تراهم في القصص و فالأفلام و وقت الحبيب يعمل فازة للي يحبها انت وحدك تتبسم اكا التبسمية اللي بعدها ديراكت تحس انك بوهالي بعض الشيء و سعات في عوض التبسيمة تلقى تنهيدة مالقلب و فما برشا مرات تغرق فيهم في بحر دموع...

بش نذكر شوي مالحاجات اللي عشتهم أنا في علاقتي اللي فالاخر باءت بالفشل...

مع بعضنا نهار كامل منتفارقوش

نحكيلو و يحكيلي كل شي !! تفاصيل حياتو الكل نعرفهم

يعرفني في حالاتي الكل و نعرفو في حلاتو الكل

وهو متغشش و هو زاهي و هو فاد و هو مخنوق و هو معندوش فلوس و هو فرحان و هو يضحك و حتى هو يبكي

يعرفني و انا لابسة بالباهي و يعرفني و انا مهنتلة و بحوايج الدار  خاطر كان يجيني حتى لباب الدار ...

يعرفني و انت عاملة مكياج و يعرفني و انا كالغولة و نخوف !! يعرف امي و بابا و خويا و دارنا الكل ...

يمشي كان معايا و يروح كان بيا

يستناني ...يهزلي ساكي كي يدي توجعني و يرزن عليا

يربطلي خيط سبادريا كي يتحل

نلبسو كيف كيف ...

يدللني و كلامو يهزلي المورال

كي نسمن يقلي بطبوتي حتى و انت بطية محلاك

وكي نضعف يقلي محلاك و انت ستيل

كي نمرض و نبدا بعيدة عليه و كي يلصقني و يقلي نرمال مرضت بييك و نزيد نمرض منك

كي نتغشش منو و نبدا نغلي كالطنجرة يسكتني ب بوسة و يقلي نعشقك

كي نسألو على حاجة حتى وقت القراية و كي ينسى الموضوع و الناس و يقلي انا نحبك...

كي ندور و نلقاه يخزرلي وكي يغدرني بتعنيقة و يكبس عليا و يمعسنيىو يطلعلي روحي ...

كي يفوتني فالكياس و يحل يدو بش انا نحط ايدي ف ايدو و نكملة الطريق

و كي نتعدو قدام مرايا و نبداو نخزرو لرواحنا...

و كي نعملو برشا عمايل و نتبولدو على اصحابنا

وبرشا حاجات يصيرو فالافلام خاطر كان بش نكمل نحكي دموعي بش تزيد تقوى و بش نزييد نتعب...

تو بش نحاول نحكي عليا و انا فالمحاولة متاع اني ندخل في علاقة جديدة

باه!!وقت تبقى برشا و انت وحدك وكل ليلة تبكي من انك وحدك وو فالواقع انت اللي مبكي روحك و مخلي روحك وحدك بحجة انك مالقيت شكون يحبك ...

وهوما اللي يحبوك برشا و انت مش عاطي فرصة لا ليك و لا لييهم و تلقى روحك ديما تبعد فيهم عليك بطريقة غير مباشرة بش تخلي روحك وحدك و كل ليلة ترجع تبكي خاطر وحدك ممكن

تولي ماسوشي و تعشق التعذيب ف روحك و كان تلقى تشرب من دمك !!

وقت تعيش برشا فالوحدة لين تعيفها و تعيف معاها روحك و حتى كالحاجات اللي كانت هي فرحتك

برشا مالانتوراج متاعك يحبو يقربولك و انت بالواحد تبعد فيهم علييك و حتى كي يوقفك حد فالشارع و تمشي و تخليه و وقت تفيق لي انت ماشية فالغلط و تفيق اللي انت واقف اما الوقت

عمرو ماياقف عليك وكل يوم ينقص من عمرك يزيد ف مشوار حياتك

تحاول تصلح وتعطي فرصة ...

رغم هذا مازلت تضيع ف حاجات ممكن يجي نهار و تندم عليها

كي تتعرف على عبد محلاه في شوي وقت يقربك عللخر و تحس روحك مرتاح و فرحان باللهوة متاعو و ممكن حتى لهفتو للكلام معاك...خاصة كي يكون عبد قريبلك فالاصل اما انتوما على

بعضكم بعاد و كي تجمعكم حاجة نادرة ممكن انت و هو تكونو مولودين فرد نهار ...

انسان مولود معاك حتى فرد وقتك و انتوما من عايلة وحدة و كي كنتو صغار عمركم ماتفارقتو و كي كبرتو بعتو و تو الوقت عاود رجعكم ...

تحس حاجة غريية ،فما برشا توافق بيناتكم و برشا حاجات ...

اما وقت يبدا يجد الجد و تحس الحكاية كبرت تبدا تحس بالخوف و تصير حاجة لا إرادية و حتى كي تحاول تنحيها تنجمش!!!

هي المقارنة اي نعم انت تقارن بينو و بين الاكس العزيز اللي منجموش نقولو عليه كامل خاطر الكمال لله !! اما انسان مفيهوش برشا اغلاط

تبدا تقارن من كل النواحي حتى الشكلية

انسان مازال يتعرف علييك تنجم تحكم عليك حكم تحكمو على عبدك معاشرك اعوام

كان عمل حاجة متحبهاش و الا نسى حاجة انت تحبها و متلهاش بيك كيما انت تحب و معيشكش برشا حاجات ماللي كنت عايشتهم بش تلقى روحك ضايعة بينو و بين القديم اللي هو

فات و عمرو مايرجع !! تي حتى كي يلبس حاجة انت تحبهاش تلقى روحك ضايعة في بحر المقارنة و الحسرة على حاجة ممكن كان جا فيها خيير راو موفاتش !!

احساس خايب برشا يجوجم و يتعب برشا و انا ملقيتش حل تملكني الخوف حكييت بأسلوب عام و خصصت منو لروحي و لتجربتي ...حايرة برشا نحب نفوت عييت باللي رجعت لحاجة ماعندي وين نوصل بيها