ما احلاها كي تلقى واحد يشبهلك و يعمل الحاجات الي تعملهم تحس روحك في العالم متاعك تتكلم مغير ما تحسب ، تعبر على مكنوناتك و تحكي على الشغف متاعك و النفس يبدى طالع هابط ، تحس روحك منتشي  مغير ما شربت مخدرات ، تحس روحك طاير مغير جوانح ، مغير ما تعرف الوقت ، مغير ما تخزر للمنڨالة .

تعيشها اللحظة بمتعتها الكل ، لانك في العالم متاعك . مثم حد يقلك شتعمل ، و هاذي تجي و الاخرى لا ، العالم الي انت صنعتو ، العالم الي تزهى وقت تدخلو ، تنسى الحقيقة الدايرة بيك و تخمم كان فيه هو .
ما أحلاها كي تحكي مغير ما تحس روحك ثڨيل على الي تحكي معاه ، لسبب بسيط أنو هو زادة كيفك يخمم ، يعشق الي تحكوا عليه.

مغير ما تشاور ، و ما غير ما تستحق انك تشاور ، تحكي و تحكي و تحكي..

ما أحلاها.. كي تبدى شايخ بروحك ، زاهي ، و فرحان لانك لڨيت الي يعرف إحساسك وقت تدخل للعالم هذاكا ، وقت تلغي العالم المحسوس الكل ، لا عاد تحس ببشر بحذاك ، لا حس لا شيء ، انت برك موجود و ما معاك كان الي يحكي معاك على عالمكم المشترك.

ما أحلاها كي تغوص و مغير ما تغرڨ
ما أحلاها كي تتعب أما تبدى فرحان
ما أحلاها كي تحكي و تلقى شكون يسمعك للاخر
ما أحلاها كي تكتب و تلقى شكون يقرالك
ما أحلاها كي تغني و تلقى شكون يدندن اللحن معاك
ما أحلاها كي تتعب و تلقى كتف تحط عليه راسك تحس بالامان
ما أحلاها كي تمثل و تلقى شكون يضحك لتمثيلك
ما أحلاها كي تمثل و تلقى شكون يبكي لشخصيتك الي متقمصها.
ما أحلاها كي تشطح و تلقى شكون يشجعك و يصرفڨلك
و فقط لانك في عالمك العالم الي تنسى فيه الدنيا و ما فيها ، و تهتم بالشغف متاعك ، و تحكي عليه لإنسان كيفك وقتها تحس انك ماكش وحدك ، تحس انك عندك عالم آخر بخلاف عالمك الي صنعتو يستنى أنك تحكي فيه الي عملتوا في العالم متاعك و انو يفرح و يشجعك و يحكيلك على الي صار في العالم متاعو. .

احكوا على الشغف متاعكم ، عبروا على رواحكم ، انتم هكا ، هكا تخلقتوا ، و هكا تعيشوا ، لانكم تلقوا رواحكم كان هكاكة ، ما تعيشوا كان بالشغف متاعكم ، و اذا ما لقيتوش شكون يسمعكم ، ميسالش اسمعوا رواحكم و عبروا لرواحكم ، و عيشوا اللحظة في عالمكم الي ما ينجم حد يفكوا منكم لانو إنتم الي صنعتوه و بنيتوه و انتم الي قادرين تعلوه و تكبروه و الا تخلوه للغبار يتراكم عليه و يدفنوا.

و في الاخر ما أحلاها كي تقول الي ما قلتوش قبل و ما احلاه الاحساس وقت تحكي على العالم متاعك.